絲絲講場：港FinTech賽考起金融界
最近你實有見過「FinTech」呢個潮字，一睇就知係講緊「Finance（金融）」加「Technology（科技）」，實情FinTech依家發展去到邊？絲絲尋日去睇咗轉金融科技產品大賽就見識到。
評審揀合作一Take過
花旗喺科學園搞咗個活動，通過比賽孕育一批科技公司，花旗除咗出獎金10萬美金外，仲會睇睇邊啲產品啱用安排合作，結果會喺十二月公布。
尋日花旗香港及澳門區行長盧韋柏（Weber）都嚟撐場，上晝做完評判，Lunchtime急急腳出返中環做嘢，下晝再返入科學園繼續做評判。
八達通行政總裁張耀堂（Sunny）亦係評判之一，Sunny之前喺花旗做過近十年，尋日見番舊同事好傾到不得了。
空中簽名代替傳統簽名
講番今次來自五個國家嘅十八支比賽隊伍，當中絲絲最印象深刻，係台灣嘅AirSig空中簽名技術，智能手機當一支筆用，拎住個電話喺空中簽名，就可以當密碼或者電子簽名咁用，其他人好難冒簽，遠睇仲以為你揮緊魔術棒！呢個空中簽名，除咗可以代替傳統簽名申請信用卡、買吓金融產品，仲可以免卡免密碼去櫃員機提款。為咗個造型，絲絲睇怕要諗諗換個簽名。
余絲韻