又話怕又要做，又話驚驚但又唔自我保護，咁即係點先！絲絲係講緊香港人用手機使用電子銀行服務嘅心態。
信貸資料庫營運公司環聯委託調研機構訪問咗500個香港成年人，出咗份報告都話，有四成人平均每月喺智能手機或裝置上使用電子銀行服務至少三次。不過，同時有45%受訪者覺得好唔安全，擔心身份會被盜用。若唔見手機，過半數（52%）最驚個人資料外洩，多過怕花錢花時間換手機（7%）一大截。
又要用又驚驚，睇怕點都會自我保護吓啩？你以為。原來有25%喺過去三年都無轉過密碼，最得人驚嘅係有23%乜嘢App都用同樣密碼。警覺性低到咁，點搞呀﹖
多啲換密碼就梗o架啦，環聯仲醒多大家四招（睇右面個表）。咦，最後嗰招係定期Check吓自己信貸狀況有冇畀人整蠱做怪，咁咪即係叫人幫襯番環聯？
1. 唔同Account（電郵、流動銀行、App、社交網站等）Set唔同密碼
2. 密碼要複雜啲
3. 唔好用公共Wifi嚟Check敏感資料
4. Check住自己信貸情況有冇古怪
余絲韻