絲絲講場：阿克曼巴菲特為健康互片
大家都知維權投資者阿克曼隻愛股加拿大藥廠Valeant呢排好唔掂，畀人話抬高藥價，仲畀沽空機構狙擊，股神巴菲特副手芒格之前仲踩多腳，直斥Valeant收購藥物專利再抬價嘅經營手法非常唔道德。阿克曼梗係條氣唔順啦，星期三更加喺一場慶祝巴菲特入主巴郡五十周年嘅座談會上，反諷巴菲特隻愛股可口可樂先至係危害社會，隔空互片。
燥底公開落股神面
早排先有雜誌將阿克曼比作「小巴菲特」，今次座談會上，阿克曼亦係以「受巴郡啟發嘅投資者」身份出席。
點知被人問到有冇同巴郡投資取向相反嘅時候，佢就即時嚟料，話自己唔會入股可口可樂，仲好唔客氣話可口可樂喺全世界搞出更多肥人同糖尿病，呢方面世界上咩公司都比唔上咁話，仲話「可口可樂嘅經營模式係點？就係等細路同大人都飲糖水代替水」。
飲食取向都唔啱牙
話時話，巴菲特出咗名每日都要飲櫻桃味可樂先至安樂，連帶可口可樂都係巴郡最大兼最耐持倉股份之一。相反，阿克曼就相當注重飲食健康，視糖分如毒藥，聽講同佢食飯只能以生果當甜品，而且幾乎所有人打佢工之後都會變瘦。
雖然巴菲特同芒格都唔在場，但阿克曼踩到咁盡確係唔多畀面。不過，睇住Valeant股價狂瀉，阿克曼就咁帳面唔見咗超過20億美元，燥，係正常嘅。
余絲韻