絲絲講場：張華峰失名嘴自己做代言
記得早排絲絲講過，立法會議員張華峰（峰哥）旗下恒豐證券位研究部董事林家亨，最近過咗檔去「洋參大王」楊永仁（即是恒發洋參（00911）主席）私人持有嘅恒發金融。恒豐證券之前一直由林家亨做「代言人」，出席各大小場合為股民教路解答股壇疑難，依家愛將走咗，峰哥會搵番邊個做公司股評人？點知峰哥慨嘆依家「名嘴」難求，想自已做番恒豐證券代言人！
估深港通車唔會大升
其實峰哥講股，都真係駕輕就熟，尋日飯局，佢就「股評人」上身，估計深港通就算開車，恒指都唔會大升，都係喺21,000點至23,000點之間上落。因始終有美國加息同內地經濟等因素影響。佢仲話，起碼要到明年下半年港股至有機會翻身企喺23,000點樓上。吓？咁散戶即係仲有排等至可以返家鄉！
呻跟錯小加 滿手蟹貨
講開股票，自然不可不提峰哥隻「愛股」港交所（00388），佢一直係大好友，今年第二季港股大時代嗰陣，港交所升至超過300蚊時，依然睇好。今時今日，港交所股價由高位回落成百蚊，張華峰尋日都有呻，話自己跟住李小加總裁一味睇好港交所，港交所股價一路跌佢都一路買入，尤其係當股價跌到落240、250蚊時，自已都入咗唔少貨，結果……唔使講，都知綁住啦。
咁港交所跌到落低位180蚊附近時，又有冇撈底？峰哥話都有買啲，不過已經放咗。不過峰哥呵番話，長線始終睇好港交所股價。有峰哥陪住，大家有冇覺得安慰番啲啲咁呢？
余絲韻