明年年初，領展（00823）主席兼獨立非執行董事蘇兆明就要離任，因為根據佢哋董事會規則，獨立董事只能做九年。
尋日就係佢最後一次主持中期業績會，領展喺佢帶領之下愈做愈旺，如果離任，外面會唔會有好多Offer？會唔會「食回頭草」返舊公司置地呢？
「Never Go Back」（永不回頭），蘇兆明話經常記住呢一句，仲話好難搵到好過領展呢間咁優良嘅企業。佢又透露，招聘新主席程序已經進行咗幾個月，相信好快有定案，可以順利交接。
最後佢回憶在任九年，領展因為身份特殊，間唔中會受到外間唔禮貌嘅對待，但財經媒體一直都對佢好好禮貌，一啲難嘅或者有趣嘅問題，都令佢好難忘，話衷心多謝大家。
余絲韻