絲絲講場：黑石先生放唔低哈佛
當今私募基金界之中，至有錢嗰個，大概都非佢莫屬，就係黑石集團創辦人施瓦茨曼（Steve Schwarzman），即是60歲生日Party豪請Rod Stewart（洛史釗活）唱足半粒鐘嗰位。佢有成900億港元身家，成功人辦如佢，心入面一樣有條刺，條刺大概就係「哈佛」兩個字。
不忿當年報讀入候補
施瓦茨曼最近接受訪問，又提起後生時入唔到哈佛單嘢，半世紀前嘅事。得哈佛收做Waiting（候補），畀着絲絲就一定滾動都嚟唔切，但嗰位係少年施瓦茨曼，佢唔高興到，就喺自己中學入銀仔直接打電話去問哈佛個Dean of Admissions「有冇搞錯」。結果冇搞錯，佢依然只係Waiting，之後「屈就啲」去咗耶魯同布殊做同學，即是日後做咗美國總統嗰個。
古仔未完。N年後，話說施瓦茨曼超豪60大壽都擺完咗好多年，佢收到哈佛嗰位Dean of Admissions嘅信認話「我估可能真係錯咗」；至於施瓦茨曼呢，幾個月前先捐咗1.5億美元（11.7億港元）畀母校耶魯。佢當年有幾唔忿氣？唔講你未必知，佢當年就算兜路都要兜返入哈佛，六九年喺哈佛讀完個MBA。
寄語哈佛叻仔要安分
好嘞，着過哈佛件畢業袍，估大概放得低？唔見得噃。訪問中被問到如果有另一個好似佢咁叻嘅年輕人想搞另一間黑石，佢點睇。
佢答話，就算對住個哈佛畢業超醒好有前途嘅，佢都係叫人家咪亂闖，唔好亂咁走出Comfort Zone（安逸範圍），等年紀大啲知自己真正能力喺邊先再算。See！「哈佛」兩個字，陰魂不散。愈得唔到，愈牽掛，呢啲搵自己笨嘅嘢，絲絲最明。
余絲韻