絲絲講場：師承兩「強」樓神 黃光耀感恩
本港地產發展商之間，競爭咁激烈，就必定同行如敵國？未必。行內有啲「樓神級」嘅老行尊，多年來其實都好積極扶持後輩。嗰日會德豐（00020）旗下會德豐地產常務董事黃光耀先同絲絲講起，好彩當年得佢兩位「強」師傅。
話說，黃光耀八九年加入會德豐，九七年由發展部轉做售樓部，佢當時上司鄒炳雄介紹咗兩位前輩畀佢識，一位就係當時恒地（00012）樓神張炳強（現任英皇國際（00163）執董），另一位係當時新地（00016）樓神蘇仲強（現任合景泰富（01813）顧問）。
營銷氣氛品牌並重
兩位師傅不時帶黃光耀一齊巡視地盤同參觀其他發展商項目。當呢兩位師傅自己開盤賣樓時，仲會安排埋畀黃光耀去觀摩，唔單止同佢分享賣樓心得，仲唔吝嗇講好多寶貴經驗佢知。
兩位師傅，就有兩套武功同心法。黃光耀話，張炳強重視賣樓時營銷氣氛，對於運用地產代理等方面有佢一套心得；而蘇仲強就好注重公司品牌發展，不時解釋佢聽品牌發展有幾重要。呢兩位師傅當年所教落嘅，黃光耀話畢生受用。
黃光耀仲好感激兩位師傅嘅無私教導，佢依家仍不時同師傅飲茶敍舊。今時今日黃徒兒自己亦已係公司高管，佢話亦會繼承兩位師傅精神去培育地產新人。
余絲韻