絲絲講場：趁熱追二孩 和美陳偉睇天意
五中全會一話宣布允許「二孩政策」，「仲生唔生」尋日即刻成為全內地至湊熱鬧嘅人生問題，講開B，絲絲醒起早排聽講和美醫療（01509）話想申請試管嬰兒牌照，咁佢哋副總裁陳偉（William）自己又諗唔諗用人工嘅方式生個B呢可。
聽William講，有內地客因為好緊張希望生B仔，所以去美國拎胚胎揀BB性別；但William話，如果係佢自己，寧願順其自然。絲絲知道William已經有個B仔，放寬二孩政策，佢又想唔想再追個B女，William話自己都鍾意B女，但再生都要睇天意喎。佢話公司上市後好忙，少咗陪老婆同B仔。明晒，總之講到追B女呢，就未有時間表啦。
港人返深圳生仔趨增
內地人來港生仔聽得多，原來亦有港人北上生仔。William話，佢哋旗下深圳間醫院開始多咗港人北上生仔，但佔比都仲係少過10%。雖然個勢係多咗，但佢話深圳分院都會專注做當地市場，因為就腳好緊要，佢哋喺廣州同深圳嘅醫院之間唔會有直接競爭，事關孕婦會揀近啲嗰間。
女士一佗B，十個有九位即變女王，不過原來女王亦有跪低時。聽William講，佢哋啲醫護人員遇上啲媽咪「扭計」想食雪糕時，只要一講到「要為寶寶着想」，啲媽咪就一定會跪低，萬試萬靈。點解孕婦最好食少啲雪糕？咁深嘅嘢，返屋企問媽咪或老婆。
岡本股價受累跌一成
講起「跪低」，「二孩」一出，日本安全套生產商岡本尋日喺日本個股價一日冧咗10.14%，事關之前好多中國遊客去日本掃佢哋嘅0.03，貪佢Made in Japan，質素有保證。
余絲韻