呢排「輪場」踏入多事之秋，繼渣打唔做輪商令到輪場少咗個靚女「小飛俠」之後，依家又唔見多一個「輪后」──郭小菱（Shirley），絲絲收到風，郭小菱啱啱離開咗做咗10年嘅法巴。
之不過，絲絲心諗，Shirley大可以休息一吓先，花多啲時間打理自己嘅私人蛋糕生意囉。因為，記得Shirley以前同絲絲講過，以往焗蛋糕都要等囡囡瞓咗先有時間！但鬼叫呢樣係佢嘅興趣咩？所以又要工作又要湊囡囡，都要做埋蛋糕生意，攰啲都值啦，因為佢係一位專業嘅cake artist嚟！
至於啱啱加入法巴做上市衍生產品部執行董事嘅黃集恩（Martin）亦向絲絲證實，Shirley已經停止咗喺法巴嘅認股證工作，以後法巴窩輪發言人主要係Martin。至於Shirley嘅未來動向，佢就話如果有新消息就會第一時間通知絲絲。
Shirley喺○五年加入法巴，負責香港同新加坡嘅衍生工具銷售同市場推廣，一○年升做部門執行董事。
余絲韻