Market Insight：藥業股估值仍偏低

看官凌晨時分便知美國議息結果，睇相佬呃你十年八年，年初問十個經濟師，九個都話年底前美國一定加息，古勝年初就已經睇死聯儲局走數話都無咁易。

經過多次量寬，華爾街對流動性需索程度如同癮君子一樣，一四年九月同一五年七月，單是加息預期，股市已出現過兩次自己嚇自己的人踩人慘劇，在通脹偏低，聯儲局又對金融市場激烈的反應投鼠忌器，已經陷入放水容易退市難的情況。

日本是上世紀的最佳例子，依家只係輪到美國。今年聯儲局主席耶倫一直口硬，表現出點都加一次先算態度。惟睇外圍，日、歐過去一年量寬，唔夠皮之餘，近期已傾緊再擴大規模，上周中國雙降加入放水，一年息已低於通脹，正式進入負利率年代。全球主要國家鬥印錢放水，鬥匯率貶值，講到底想將衰退及通縮出口，美國睇住自己盤數，經濟火車頭復甦速度尚算可以，但要拉郁歐、日、中國及一眾新興市場，真係談何容易！

聯儲加息進退維谷

事實上，在一四年美金表現一枝獨秀，逆轉成為強勢貨幣之後，美國通脹已經維持在偏低水平。好聽講，有較大的彈性畀聯儲局維持低息多一陣子，現實係美國一確認息口回升，美金肯定再飆升，到時跌入通縮唔通又掉轉頭放水咁兒戲咩！

聯儲局依家係加又死唔加又死，拖拖拉拉咁多年，伯南克年代訂下低於6.5%失業率出手的承諾早就拋諸腦後，話加唔加，固然公信力掃地，但債市預視只得三分一機會之下夾硬嚟，一個唔小心搞死股債市出現骨牌崩盤，多年救市努力恐怕毁於一旦。

基金靠邊站，昨日港股成交縮到得610億元，恒指跌186點收報22,956點。經過十月初的挾淡倉及基金補貨，踏入月中，港股成交愈玩愈縮，「十三五」炒到水尾，人行雙降都出埋，短期無故事落鑊，基金大戶一副提早年底盤點的姿態。一睇昨日七隻藍籌逆市向上，有電能（00006）、港鐵（00066）及煤氣（00003）三隻公用股在內，多少感受到閒錢多焗住入市的基金苦況。

國藥展現規模效益

盛傳「十三五」會研究重啟互聯網彩票及發出更多牌照，彩票股如華彩控股（01371）、中彩網通（08071）及第一視頻（00082）已是昨日散檔一樣的市況下，鮮有見炒味的奇葩。

升得快，跌得仲快，炒貨乾升到個個都唔信的恒大健康（00708），昨股價創過2.35元新高之後，走勢便如山泥傾瀉一樣，倒插27.5%或0.62元，收報1.63元，炒家又一次樂極生悲。連帶馬雲系的阿里健康（00241）都被拖埋落水，跌2.5%收6.14元。

一隻轉型十畫得一兩撇，另一隻啱啱在網上藥品銷售起步，盤數未有耐見得人，兩隻股票市值唔細，高位跌一截都仲有140億元及501億元，反而近期見走勢慢火煎魚，拾級而上的國藥控股（01099），更加啱嘴形。

國藥首三季純利升32.6%至28.4億元人仔，期內營業額則升16%至1,698.1億元人仔，盈利增長較中期的30.6%大。面對醫改壓力，部分省份對藥品價格打壓力度唔輕，醫藥製造業收入增幅放緩，但相對其他暮氣沉沉行業，醫療產業還是比較標青。國藥過去幾年併購效果漸現，規模效益改善，管理費用開支率下降，交出比行業平均為佳的盈利增長動力。

健康中國錢途光明

於○九年上市的國藥，是內地藥品及醫療保健產品最大的分銷及零售商，今年六月，分銷網絡覆蓋全國三十一個省、直轄市及自治區，直接客戶包括近1.3萬間醫院。中國人口老化，估計二○年全國60歲以上高齡人口達2.48億，對慢性病等醫療需求龐大。

近期盛傳繼美麗中國之後，五中全會將把健康中國寫入文件，提升至國家戰略發展層面，推動醫療產業達到10萬億元人仔的市場規模。更重要係，國藥一六年預期市盈率16.7倍，幾乎貼實上市以來15.5至15.58倍的下限水平，以未來兩年預期盈利增長大約兩成，最怕股價大上大落之士，國藥現價都幾吸引。

古勝