絲絲講場：翁世權長假轉戰機械人

囝囝合作 志在鬥撼

呢個「廢柴機械人大戰」源自日本，玩法就係大家砌啲機械人出嚟對撞，唔理製作粗糙，唔理「頹撼」起嚟幾冇造型，總之最後唔散「打不死」嗰個就贏。舉辦單位仲話明理念係「享受失敗」同埋「享受無法順利運作的狀況」，即是唔再有半點驚咁去勇於接受挑戰。絲絲覺得，會唔會反映咗Simon「鳳凰涅槃、浴火重生」心態呢可。

Simon自己就話，見香港Maker Faire舉辦咗呢個大戰，覺得好得意，所以就同六歲嘅囝囝參賽。Simon暫時未開始郁手砌機械人，仲構思緊，但大方向係要夠堅硬，希望撞極都唔散。砌機械人對Simon嚟講可能係Easy Job，因為佢同囝囝嘅親子活動就係砌模型，放假就會砌吓飛機同艦艇。

做義工助3D打印義肢

Simon除咗砌機械人大戰外，仲喺一個名為「GIVEmeFIVE」嘅活動做義工，幫助截肢嘅小朋友送上義肢。佢話，「活動係利用3D打印機製造義肢，再喺十二月送畀有需要嘅人，今次活動希望畀機會大眾接觸3D打印技術，同埋教育小朋友利用科技去幫助其他人。」

渣打突然話重整架構，股票衍生產品部告一段落，原任渣打股票結構性產品及認股證銷售主管嘅Simon亦離開渣打。佢同班渣打同事五年前由零開始，到以窩輪界前列市佔率離場。

話時話，若想睇吓Simon同囝囝點「打不死」，十一月廿八至廿九日去理工大學，機械人大戰就喺嗰度爆發。

余絲韻