葉氏化工（00408）做開油漆、溶劑、化工產品，佢哋創辦人兼主席葉志成私人Um荷包開戲，仲搵咗劉松仁做主角添！忽然跨界玩拍戲？皆因適逢葉氏化工開業45周年，葉主席想拍套真人真事改編嘅戲喎。
套戲講啲乜？就咁嘅，話說喺上世紀七十年代，大批內地青年游水落嚟香港，由零開始打拚。阿主角「劉松仁」同阿妹就係其中兩個，佢哋兩兄妹喺一九七一年，就拎住4,000蚊，喺西環一個只得40方呎嘅鐵皮橫門創業，之後就‥‥‥總之過咗好多年，就有今時今日。
戲入面嗰檔40方呎鐵皮橫門生意，起名「恆昌行」，亦即係葉氏化工嘅前身。咁劉松仁飾演緊邊個？你話呢。點解搵劉松仁？公司話留番遲啲葉老闆親自解畫喎。套戲預計出年下半年喺香港同內地上映，收益不扣除製作成本，會全數捐作慈善用途。
余絲韻
