絲絲講場：萬聖節買股贏面大？

Party嘅指標？No啦，呢度係財經版，要講梗係講呢啲，先。嗱所謂「萬聖節指標」係指，十一月到四月呢半年期間個股市，一般會「老利」過五月到十月嗰半年。信者就會喺萬聖節（十月三十一號）入貨，一直持貨，到四月三十號再「機械式」沽晒啲貨，到下年萬聖節又再「機械式」入貨，亦即是洋人股民口中嘅「Sell in May and go away」（五月沽貨走人）。

配埋MACD 回報8.8%

當然，「機械式」買賣好似兒戲咗啲啲，有周期理論教父之稱Jeffrey Hirsch話，投資者可參考一個名叫MACD（俗稱「牛熊差距」）嘅技術指標，嚟睇吓應該十月邊日入市，同四月邊日沽貨。

「萬聖節指標」有幾靈驗？有洋人傳媒統計過，由○二年中至今年九月三十號回報統計，跟「萬聖節指標」買賣嘅回報有7.4%，高過齋買長揸，配埋MACD回報仲高至8.8%添。配洋人道指就似層層（睇隔籬圖），對住恒指同A股又點？怕且要研究吓「盂蘭指標」或「驚蟄指標」喇。

黑橙潮裝迎Halloween

好嘞，學術交流完，係時候入正題：今個Halloween點先夠潮？經營潮牌D-mop嘅永嘉（03322）業務總監李俊豪（Fredrick）話萬聖節裝身嘅Element（元素）不外乎黑色、橙色同骷髏骨頭，不過要睇番個人Style咁話。嗱睇埋（左邊圖）Fredrick真人示範，以後咪話淨得扮鬼扮馬一味喇。

余絲韻