絲絲講場：林家亨跳槽舊老闆剪綵

張華峰演繹同行非敵國

「峰哥（張華峰）器量非常之大，佢都支持我創業，峰哥第日有嘢要幫手，我第一個企出嚟！」林家亨將會由做咗14年嘅舊舖恒豐證券，跳槽到新老闆楊永仁新開嘅恒發金融做董事總經理。難得嘅係，身為恒豐老闆嘅張華峰仲會現身剪綵，林家亨都同絲絲講話好感動。

峰哥話今日一定到：「我全身投入立法會議員工作，恒豐現有業務由兩個細佬睇住，都希望後生仔（指林家亨）出去發展」，峰哥仲話大家「永遠都係朋友！」完全冇話同行如敵國，呢份老牌華資行嘅人情味，絲絲絕對感受得到。

洋參大王越界 搞資管

Matthew（楊永仁）就同絲絲講，佢隻恒發洋參（00911）舊年上市時先認識Simon（林家亨），傾咗一排好投契就撬佢過檔，將會叫佢幫手搞散戶生意同申請9號牌（資產管理牌照）。佢又話Simon係股評人，將會繼續畀Simon亮相，唔會叫佢封咪，等佢做「生招牌」。

Simon就話今次過檔「咩都要做」，確實係一個難得嘅發展機會，由過去做研究部進身前線，楊老闆Matthew都好識做，預咗啲Option畀Simon做股東。新公司都有親切感，事關同舊舖都有個「恒」字。絲絲都祝Simon更上一層樓。

余絲韻