逾800隻股可沽空
若投資者之前從未試過沽空，究竟有咩程序（口架）？首先就要喺證券行開個借貨沽空戶口，亦要填寫稅務局嘅《證券借用及借出協議登記表格》，以及繳付270蚊登記費用，然後就可以詢問證券行，有冇你想借貨沽空嘅股票，只有被聯交所列為「可進行賣空的指定證券」先可進行沽空，名單可喺港交所網頁內查閱，目前有800幾隻。
若果證券行有貨，你就要喺借貨前存入足夠開倉保證金去自己嘅股票戶口。保證金金額一般為股票價值1.25至1.3倍，例如借1,000股，每股100元，所要準備嘅保證金最少就要12.5萬元。
貨源若少 息達10厘
借貨成功後，就可以沽出股份，到T+2當日，開倉保證金就會由你喺股票戶口轉到借貨戶口。借貨戶口嘅保證金水平一般要維持喺1.1至1.2倍嘅水平，若果期間所沽空股份大幅上升，就要補入保證金。若果想平倉，就可以喺市場買番啲股份，然後通知證券行。
借貨仲要畀利息，一般要5厘年息左右，借一啲貨源較少嘅股份，利息分分鐘高達10厘呀。讀者可能諗，借貨咁麻煩，可唔可以落咗沽盤先，之後先買番啲貨做交收呀？咁方便好多喎。Kitty答你「梗係唔得啦，根據香港法例，出售本身並冇持有嘅股份係犯法（口架）。」