孖妹Ｓ檔案：學曉做空軍市反轉照賺

比率股價或會背馳

林：輝立証券衍生市場部經理　林日文

張：信誠證券聯席董事　張智威

輝立林日文話，偏向睇行業同公司基本面，來決定幾時出擊。（蕭毅攝）

信誠張智威話，沽空對把握時機嘅要求好高。（孫冰玉攝）

彩兒：我有做功課（口架），每日收市都留意大市同個股嘅沽空數據，睇實個沽空比率排名，見邊隻股份沽空比率高就跟住沽，我諗咁做實冇死啦。

林：咁又未必喎，沽空比率同股價成逆向走勢其實亦會發生，其中一個原因係投資者沽空一隻股票後，賺夠就要買番啲股份平倉。純粹見沽空比率增加先跟住做沽空，隻股票可能已掉頭向上，真係要小心。

數字高企關對沖事

林：另外，有啲股票嘅沽空比率長期都好高，背後唔係因為好多人睇淡佢，而係因為相關嘅衍品發行商同莊家都要對沖自己嘅持倉，呢個情況特別多發生喺一啲ETF（交易所買賣基金）、指數成分股或者有窩輪、牛熊證、期權嘅股份。

又例如，有啲股票進行供股，申請完供股，要等兩個星期啲新發行嘅股票先會到手，放唔到出去，呢種情況下，好多人都會借貨沽空做對沖，但佢哋未必睇淡隻股票。

Kitty：唔怪之得啦，好似恒大地產（03333）咁吖，之前成日喺沽空比率榜名列前茅，但股價年初至今就升咗七成有多。

林：其實沽空比率係一個有少少滯後嘅數據，大家見到嘅已經係成交咗嘅數字，想跟住沽已經要等下一日，同埋沽空嗰吓動作，同某一個投資者真實嘅倉位係兩回事，數字係Transaction，睇淡與否係講Position，外人並不會知道你係想平淡倉還是想加倉。

績前做功課刨新聞

彩兒：咁講法，真係好易中伏喎。

林：見到一隻股份嘅沽空比率突然大幅增加，最緊要係睇吓佢最近有咩新聞。我見好多時大行報告大幅削一間公司嘅目標價，隻股即日真係可能會跌一跌，沽空比率增加，但之後未必會長期下跌，反而可以買番啲博反彈。

另外，好多人會喺業績前做定功課，預計間公司盈利唔理想，一早沽定先，不過要留意，當市場整體已預期公司業績會差，到一出業績，結果勝過預期，好大機會即時反彈。

留意波幅 冧市行動

彩兒：咩情況先好主動出擊做空軍呀？

林：我就偏向睇行業同公司基本面，以思捷環球（00330）為例，睇到佢嘅業績愈來愈差，盈利一年比一年少，今年仲由賺變蝕，所以我會長期睇淡，出手沽空。又例如，油價一日跌幾個百分點，可以趁呢類負面消息短炒一下，沽空油股。

投資者亦可以留意一啲升過龍嘅股份，好似之前內地減咗汽車稅，刺激汽車股一下子升咗兩、三成，但預計佢哋嘅生意唔會咁好，又可以沽吓。最好就係趁大跌市沽空，嗰陣十隻股有九隻都會跌，仲要睇吓隻股票以往嘅波幅，好似啲收息股咁吖，佢哋跌幅一般唔大，沽空唔會賺得多。

張：揀嘅股份成交最好夠大，因為借出股票嘅人可能隨時要求攞番啲貨，隻股票成交唔夠大，有可能想平倉都平唔到呀。

RSI及支持位睇跌浪

Kitty：睇準時機沽空，仲要喺適當時候平倉，難度好高啫。

林：短炒嘅話要睇吓圖，睇隻股份跌得多唔多，有啲股份係會跟住一個趨勢上落，如果突然跌到拋離晒下降軌，應該等升番啲先再沽過。

張：借貨沽空要畀利息，風險幾高，所以唔同買股票，可買咗放喺度長揸，最好就係炒一個跌浪就走，投資者可運用RSI、支持位呢啲技術分析方法，睇一個跌浪幾時完。

沽空對把握時機嘅要求好高，有啲人喺壞消息出嘅時候唔敢沽，結果等到跌浪嘅尾聲先去沽空；又有時當壞消息出嘅時候，隻股票唔係即刻跌，呢個時候就要睇投資者夠唔夠膽等。

五中概念股諗得過

Kitty：咁依家又有咩股票好沽空？

林：思捷最近升番，可以考慮；另外，內地五中全會期間，環保呢類概念股事前應該會被炒起，但開完會發覺「冇咩料到」，可以沽空。

張：我覺得賭業股都反彈得差唔多，值得沽空，其實澳門政府都冇咩實質政策可以刺激賭業收益，近期賭股只不過靠概念反彈。

若有料報畀彩兒同Kitty或有嘢問，可電郵money.biz@on.cc