Market Insight：影業股資金追捧

周三假期間，A股插水，昨尾市報復式反彈，但港股一於少理，低開後全日得個悶字，埋單跌144點報22,845點，成交七百億唔夠，惟10日線未穿前，大市傾向似整固格局居多。藍籌方面，中移（00941）首三季業績升3.4%，比分析員估計理想，但怯於今個月開始引入「月費數據用量當月不清零」，第四季業績九成九會轉差，埋單要跌3%。

聯通（00762）亦跌2.9%，收市公布首三季賺81.81億元人仔，按年跌22.5%，單以第三季計跌幅更達69.3%，貼近大行預測下限，都奇怪上星期鐵塔公司重組消息，通街人人唱好，聯通股價當日反高潮，高開見11.36元高位後，隊到開巷，昨日10元關都失守，同九月底股災低位9.45元僅一步之遙，睇嚟古勝又要為癡心錯付而交學費。

商品反彈告一段落

商品價格同環球股市，在十月冚倉之中衝完一浸，已見鳴金收兵迹象。紐約期油十月初由每桶44美元樓下，一口氣升穿八月底高位48.42美元，以為旗形突破點都有十蚊八蚊美金升吓，殊不知衝到上50.9美元咁快又腳軟，隔晚已輾轉返回45.2美元水平。

睇嚟波斯灣產油國財赤嚴重，逼住賤賣石油維持收入的威力，比石油企業勘探開支縮皮大得多，油價有反彈無力升，看來50美元阻力唔細。

世銀調低全球能源價格預測，真係同「阿媽係女人」一樣，不過「三桶油」都要跌2.6至2.8%，從油價及石油股走勢，十月初商品死貓彈似乎告一段落。

今年內地經濟保七睇落危危乎，大行近排陸續調低一六年內地經濟增長預測。當下，環球經濟乍暖還寒，中國產能過剩的問題難以解決，製造業得番半條人命，世界工廠金漆招牌亦在褪色中。早幾日的第三季GDP中，中國服務業對經濟的貢獻超過一半，去到51.4%，比舊年多2.3個百分點，在結構性改革，產業提升的大趨勢下，股民似乎都要與時並進，投資焦點唔好再用舊有思維，淨望實爛銅爛鐵，製造出口，應側重較多服務增值產業。

行業無懼經濟冷風

個個話中國經濟有排搞，不過，電影市場卻是一路奇兵，完成感受唔到經濟冷風。好似今年「十一」長假期，全國唔少房地產展銷會人潮冷清，同期電影票房卻達到18.75億元人仔，比去年勁升七成七，而今年首九個月，全國電影票房收入累積330億元人仔，按年勁升五成，比一四年全年已經多出34億元人仔。

戲院開極都唔夠，票價加極都坐滿人，兩句形容晒當前內地電影業情況。年初至今，中國最高票房紀錄的十五套電影，八套屬今年上畫，年初的《狂野時速7》，中國票房24.2億人仔破晒外語片票房紀錄，計落收3.8億美元，居然比《狂7》美國本土3.51億美元仲要高。片商一心要賺人仔，近排荷里活大片愈來愈多中國演員客串，加入更多中國元素並非無因。

過往香港有「東方荷里活」美譽，近年大量人才北上掘金，但規管所限，發揮到幾多大家心照。廣電總局規定的唔准有鬼、早戀唔可以成功、小三不能有幸福，香港人睇落都夠晒騎呢，合拍片未必係大家杯茶，但製造團隊、發行商以至院線，可以在中國電影熱搵真銀先最重要。

IMAX備受基金青睞

本地有唔少相關上市公司，隨口講得出有阿里影業（01060）、美亞娛樂（00391）、橙天嘉禾（01132）、寰宇（01046）、天馬影視（01326）、星美文化（02366）同意馬（00585）等等，睇見電影業熱爆的形勢，似乎值得大家做多點功課。若嫌炒味太濃兼難以捉路，可以留意早排上市的IMAX中國（01970）。

唔講唔知，中國IMAX票價介乎100至150元人仔，比美國同香港仲要貴，仲成日出現黃牛飛情況，炒到三四百元人仔，論估值呢隻半新股一啲都唔平，150億元市值，舊年賺緊2,278萬美元（1.77億港元），純炒中國影業熱潮同獨家村概念，睇個勢基金已上齊貨，可以睇實。

古勝