絲絲講場：大鱷阿克曼慘遭剃頭
美國對沖基金經理比爾‧阿克曼（Bill Ackman）之前打鑼打鼓狙擊保健產品直銷商康寶萊，搞到康寶萊一身蟻，件事仲未收科，估唔到阿克曼自己隻愛股──加拿大藥廠Valeant亦畀人狙擊，畀Citron Research（香櫞研究）話經營模式似足能源商安龍，就係嗰間因會計帳目造假而摺埋咗嘅安龍。咦？咁似阿克曼之前狙擊康寶萊嘅台詞嘅，今趟仲唔係「剃人頭者，人亦剃其頭」嘅完美演繹。
愛股被質疑造數
阿克曼係著名「維權投資者」，即是嗰啲通過行使股東權利而向公司管理層施壓，去改變一啲佢哋睇唔過眼嘅公司決策；嗱你叫佢做大鱷亦得，只係觀點與角度。
至於今次狙擊阿克曼隻愛股Valeant嘅，就係沽空機構Citron Research。「沽空機構」又係乜？即是邊唱淡隻股、邊沽空嚟賺錢嗰啲。
話說Citron周三發表報告，質疑Valeant同專科藥房Philidor以及R&O嘅關係。其實，唔少藥廠都會透過呢類藥房儲存及發放藥物，確保藥物被正確使用。不過，Citron話Philidor同R&O唔單止電話號碼一樣，連網頁上嘅文字都非常似，根本係同一家公司，仲話係Valeant用嚟開立收據、製造虛假銷售數字「造數」嘅影子客戶。
股價曾瀉近四成
報告一出，Valeant喺紐交所股價即暴跌，一度狠插39.6%，係廿年幾來至傷。Valeant之後反駁Citron，話所有銷售都係賣咗藥物畀病人後先至入帳，無花無假，絕對符合會計規定兼合法。
阿克曼做得Valeant最大股東之一，亦即刻飛撲出嚟話自己唔單止無沽貨，仲入多咗貨。嗱你話佢趁機低撈又得，話佢要托住股價亦得。總之Valeant周三收市跌幅收窄至19.1%，報118.61美元。不過，睇番Citron畀Valeant嘅目標價只係50美元，最終邊個贏邊個輸，大家好擔定櫈仔。
話時話，絲絲尋日睇住啲外國網媒文采大發揮，又「Ackman Feeling Shortseller's Sting」，又「Ackman was getting a small taste of his own medicine」、又「Prominent investors, including Ackman, feel Valeant's pain」咁。嗱「剃人頭者，人亦剃其頭」原來可以咁形容，呢鋪仲唔學埋英文。
余絲韻