絲絲講場：一隻肥手指幾累德銀輸468億

呢單不幸，發生喺今年六月（點解事發咗一排，呢兩日先爆出嚟？你估吓），主角係德銀倫敦外匯部一名初級交易員。

落盤淨值搞錯總額

一般嚟講，銀行處理對沖基金交易嘅時候，會等到全日交易結束後，經加加減減再將淨額一次過支付，但故事主角落盤時，竟然唔係用「淨值」，搞錯用咗「總額」，單交易就係咁多咗好多個零，德銀結果大嗱嗱送咗60億美元（約468億港元）畀一家美國對沖基金客戶使。

好彩追得番，人哋對沖基金第二日原銀奉還，否則德銀業績會更難睇；但都揭露咗德銀嘅內部問題，醜爆。

呢類烏龍錯誤，洋人稱之為「Fat-Finger（肥手指）」，原指手機Keyboard（鍵盤）粒掣太細，手指太肥，唔小心按錯掣咁解。「肥手指」錯盤，冇錯，業界好常見，但「肥」到成468億元嘅，絲絲就冇乜點見過喇。

阿頭放假 無人覆核

德銀呢次點解冇晒佢哋個「四眼原則」？「四眼原則」者，「Four Eyes Principle」也，即是任何交易都要經「四隻眼」睇過，即係要畀多個人覆核。咁啱得咁橋，主角個阿頭聽講嗰日放咗假，唔知係咪無王管，就搞成咁。

德銀已經因為涉嫌違反伊朗交易禁令、操縱倫敦銀行同業拆息同外匯市場、仲有喺俄羅斯洗黑錢而被監管機構咬住唔放，希望班細嘅醒定啲啦。

余絲韻