絲絲講場：Apple創業作Bid到6百萬？
一部蘋果電腦值幾錢？分分鐘可以去到600萬港元！斷估唔係你屋企用緊嗰部囉，絲絲講嘅係第一代蘋果電腦，即是七六年出世，由蘋果前教主喬布斯同佢當年拍檔沃茲尼亞克親手喺屋企車房嵌出嚟嗰批Apple-1，其中一部依家喺網上拍賣緊。
上周四佳士得搞咗個「7個世紀的科學」系列拍賣，由中世紀至70年代嘅科技產品都有，Apple-1就係其中一件。
部機仲連埋原裝Operation Manual（說明書）連卡式帶三餅。以前Boot機要用Floppy（磁碟），未有Floppy嘅年代就係用卡式帶嘅。如果你連Floppy都未聽過？咁就算啦。講番部Apple-1，嗰三餅卡式帶上面貼咗乜嘢Label有粒咩字母，佳士得都講得清清楚楚，仔細成咁，係確保所有嘢係原汁原味。
嗱仲有，本Operation Manual仲係偉恩寫嘅，偉恩係邊位？就係設計第一代蘋果Logo嗰位，個Logo點嘅樣？上面有相，自己睇，包你認唔出。
部機仲識唔識郁？唔知呢，事關對上嗰次開機係○五年，即係10年前。
全世界僅剩 50部
起拍底價係24萬英鎊（約港幣288萬元），佳士得估計會拍到50萬英鎊（約港幣600萬元）。點解咁矜貴？皆因Apple-1當年只出過200部咁大把，第二年佢哋鼓勵人用部舊Apple-1嚟Trade-in新機Apple-II，收回嘅Apple-1就拎去毀滅。所以當今世上只剩得50部Apple-1，當中好多都係由博物館收藏，私人收藏冇乜幾多。
想知依家Bid到乜價位？自己上網Check，仲有十日你Bid，個拍賣至廿九號先完。
余絲韻