絲絲講場:信誠張智威渡海照講股

啱啱過去嘅周日維港渡海泳,信誠證券聯席董事張智威(Alvin)都有參加,仲成功游畢全程。今次佢首次參與,就親身感受到乜叫驚濤駭浪。Alvin仲三句不離本行,話大海如同股市每每會有大風大浪,但投資者揀中優質股,就自然可以乘風破浪咁話。

Alvin其實上年維港泳都有報名,但太多人參加,佢過咗水試都抽唔中,變咗今年先第一次參與到。佢話財金人壓力大,唔多唔少都要有啲興趣同運動減吓壓,佢自己就鍾意攝影、行山同游水咁,其中游水更係幾乎隔日就去泳池游。之不過,今次游維港可謂係另一種挑戰,因要應付較急水流,同喺泳池游好唔同。

落場常會遇風浪

今次由鯉魚門游去鰂魚涌,Alvin原先目標係半個鐘完成,結果用咗51分鐘,所以佢自己唔係好滿意成績。不過,佢話自己唔屬於比賽嗰個組別,而只係參與,所以壓力無咁大。兼且游1.5公里其實已經唔簡單,加上水流咁急,泳手都游到偏離晒,所以佢估計自己實際游咗超過2公里。

佢仲話,炒股同渡海泳一樣,落場每每會遇上風浪。佢仲畀埋貼士話,依家港股雖然好似維港咁大風大浪,不過只要揀揸優質股,特別係股息有6厘或以上嗰啲,就進可攻退可守。個貼士畀得咁響,仲唔快啲揀股?咁唔算偷步,絲絲話嘅。

余絲韻