絲絲講場：超跑「色」揀財會贏
法拉利今個星期三就喺紐交所掛牌上市，有貨梗係「揸」住先，若然股價爆升，到時揸法拉利就真係不是夢喇。諗到呢度，係咪覺得有必要諗吓架超跑要咩色先。咪睇小顏色，除咗反映車主性格，仲會影響個二手價。揀錯色，超跑即刻變錢七。
銀白爆冷最銷得
以為超跑就一定係麥拿侖橙或者法拉利紅？唔係噃，實情最受歡迎係白、銀同灰。尤其係銀色，三成幾嘅豪華車都係銀色，其餘有三成就係白（唔理係雪白、米白、定係其他各種白）。無論閣下幾鍾意黑色，Sorry，舊年賣出嘅豪華車中，只得8.5%係黑色。都要揀黑？咁睇你有幾想與別不同，又有幾唔介意人哋唔覺你架車係超跑囉。
咖啡色即買即輸
揀大紅同鮮黃嘅，顯示車主後生夠激又飆得；揀綠同湖水綠，就代表係個極重視高性能；揀銀色同白色就冷靜兼夠豪。唔係絲絲講，係Cadillac嘅專家講嘅。
性能先至緊要？顏色呢啲「門面嘢」由得愛人揀就得？嗱，咪話唔提你，架車乜色直接影響二手價。唔志在嘅，咪揀啡色囉，個價即貶幾千到幾萬蚊；志在嘅，就唔該揀啲五年後都仲會興嘅色。
車嘅顏色同時裝一樣，有Trend睇，好似湖水綠喺九十年代潮過，想永遠興就唔該揀白色吖。若果想連架車嘅內籠都贏埋，咁就要聽專家話，內籠要揀啲畀人感覺好似身處屋企嘅顏色。
喂，決定好架法拉利乜嘢顏色未？（首先，你要買得起法拉利。）
余絲韻