絲絲講場：港新進富裕族「錢景」頹爆

六成人儲蓄為退休

叫得做香港區嘅新進富裕族，首先家庭月入至少3萬港元，今次渣打委託機構訪問咗一千名香港新進富裕族，了解吓佢哋對財富管理有咩睇法。

雖則叫富裕族，唔代表錢途一片光明，調查顯示少過一半（48%）受訪者覺得香港就業前景良好，喺芸芸地區中，只跑贏非洲嘅肯尼亞咁大把。後生仔錢途就更灰，只有25%覺得年輕人有良好前途，低過其他受訪地區一大截，榮登錢途最悲觀地方榜首。

既然冇錢途，咁辛苦儲錢為乜？香港人似乎嚴重缺乏安全感，首要儲蓄目標係用嚟準備退休（61%）；但隔住條河嘅內地，人哋有61%受訪者話首要目標係去旅行。只不過相隔一條河，人生觀就差咁遠！

中長期買「磚頭」傍身

咁賺咗錢，香港人又鍾意點使呢？調查話，香港人一年內嘅目標係買科技電玩同旅行，但中期（呢度講緊兩至五年）就係希望買番幾舊磚頭傍身；至於長期（講緊十年）都依然……依然係想買磚頭。睇嚟置業係香港人嘅「人生目標」。

不過樓價咁高，都令香港人推遲咗置業夢，覺得一年內買樓係優先目標嘅人只有14%，近半成（46%）人都覺得「睇定啲」兩至五年內買會比較好。

呢班新進富裕族自覺冇「錢途」，但銀行喺佢哋身上，反而睇到銀行本身嘅「錢途」，事關渣打個人金融業務董事總經理及客群管理部主管王維憲（Teddy）話，估計呢個族群今年可為香港銀行界帶嚟嘅收入，有成40億美元，成312億港元o架！

余絲韻