孖妹Ｓ檔案：美細價股王 教你揀靚貨

基金回報跑贏同行

J：Oberweis國際機會基金助理基金經理 Jeff Papp

彩兒：冇啦冇啦，環球股市經歷第三季滑落後，大部分市場升幅化灰，港股第三季就累跌逾5,400點，我今年買入嘅細價股，隻隻都跌四、五成，轉季我仲邊有錢買衫喎。

Kitty：你睇吓呢隻Oberweis國際機會基金（Oberweis International Opportunities Fund），佢專投資美國市場以外、市值50億美元或以下嘅細價股，過去三年同五年年度化回報分別有近兩成同15%，大幅高於同行約8%同7%（數據截至十月七日）。我真係覺得呢隻基金嘅Fund Man相當有意思，如果偷學到佢一招半式，話唔定我哋可以年年飛去歐洲掃貨呀。

J：其實市場嘅效率好多時都唔高，即係未能迅速對公司嘅轉變作出反應，當公司公布業績超出預期時，市場好多時亦需要數月，甚至係數年時間將利好因素反映喺股價上。我哋基金採取「由下而上」嘅選股方法，着手發掘基本面經歷正面轉變、盈利因而有機會超出市場預期嘅公司。

Kitty：依家好多Fund Man都估緊聯儲局幾時加息，又睇實中國經濟增長速度。如果學你「由下而上」嘅選股方法，係咪即係唔使理呢啲宏觀經濟因素？可以慳番好多時間？

J：我哋都會留意宏觀經濟環境，只不過呢樣嘢唔會主導我哋嘅投資決定，所有決定都是由基本面出發。好似我哋投資加拿大特賣場Dollarama（DOL）咁吖，呢間公司原本以「一蚊店」形式經營，所有貨品一律售1加元，數年前調整銷售策略，喺1加元之外，多加幾個價格點；我哋就係睇準呢個轉變可以令Dollarama盈利顯著增加，所以決定買入股份，最終獲得理想嘅回報。

脫離預測 即沽自保

彩兒：細價股嘅股價好多時都會大上大落，但你就淨係買細價股，你都好大膽喎。

J：相比起大公司，規模較細嘅公司可作出較多轉變，有較大機會交出超乎市場預期嘅業績，所以我哋會集中喺細價股市場找尋投資機會。其實咩都係講風險管理嘅啫，例如可以睇股份回報嘅標準差，去衡量佢哋嘅波幅。基金會買入一啲市場給予其盈利預測過低嘅公司，但若現實情況未如我哋嘅預測，就會沽出股份，以控制風險。

Kitty：我見你一隻A股都冇揸，唔通連你都驚咗A股隻熊？

J：基金會買入香港上市嘅中資股，佢哋喺估值、透明度方面都比A股好。另外，我哋比較專注投資日本、歐洲等成熟市場，但其實唔少呢啲成熟市場嘅企業都有中國業務，畀我哋間接接觸中國市場。我哋覺得外國企業打入中國市場，會比中國企業走出去容易。

唔信華經濟續放緩

彩兒：依家中國經濟真係好似好唔掂喎，最近PPI、PMI嗰啲數據都鬼咁差，都唔知仲保唔保得住每年7%增長。

J：中國正面對經濟放緩嘅問題，更有一啲通縮嘅徵兆，政府喺應對呢個情況嘅反應略為緩慢。但我估中央未來會續推出類似降低汽車稅、放寬住房限購政策等嘅刺激措施，以穩定經濟，所以唔太相信中國經濟嘅增速會持續放緩，只是增長嘅結構會有所改變。一啲受惠於中國經濟由出口主導，轉型成為內需主導嘅企業，應可續有強勁表現。

Kitty：我見你隻基金嘅現金比率逾6%，係咪覺得依家環球市場立立亂，呢個時勢都係「現金為王」？

J：咁又唔係，只不過我哋喺季尾做多啲獲利套現，以預留更多資金投入新發掘嘅好公司，等待嚟緊嘅業績期食胡。環球市場對中國經濟轉差嘅反應都幾負面，紛紛調低咗環球企業盈利預測。但我哋覺得市場就嚟去到一個點，係市場對企業嘅盈利預期低過真實情況。

港股波動 入市良機

彩兒：港股已經連跌五個月，市盈率唔夠十倍，一句到尾，依家係咪入貨嘅好時機先？

J：港股現時的確有超賣嘅情況，好多負面因素已經反映喺估值上，目前呢個估值令港股好有趣。投資者幾年後望返轉頭，可能會發現目前係買入港股嘅好時機。我預期未來港股市場仍會波動，但以估值睇嚟，股價有唔錯嘅支持。

拍檔發明獲利策略

Oberweis國際機會基金經理Ralf Scherschmidt以往當分析員時，留意到賣方分析員在業績期時，往往要評估多家公司，規模較小的公司一般都被排到最後，他們預測公司盈利的數學模型，很多時運用了過時的數據，他因而想到細價股所受關注普遍較少，其盈利及價值有較多機會被低估。

有研究顯示，若公司公布的業績優於預期，該股隨後一段時間很多時會持續向上，原因是市場需時了解公司的轉變，及將利好因素反映在股價上，這個現象被稱為盈利公告後股價飄移（Post-earnings Announcement Drift, PEAD）。Ralf Scherschmidt構想出的獲利策略，就是建基於此現象。

吼盈利勝預期公司

該基金的團隊每日都會在環球市場，留意是否有盈利高於市場預期10至20%的公司，然後作出16個步驟的研究，首要的就是了解盈利高於市場預期的原因。當他們認為一家公司的盈利在未來幾年有機會高於市場預期最少20%，便會決定買入。

Oberweis國際機會基金小檔案

基金規模：逾6.18億美元（逾48億港元）

回報：+9.11%（年初至今）、+19.75%（三年年度化）、+14.99%（五年年度化）

三大持股：Dialog Semiconductor（德股：DLGS）、Pandora（丹麥股：PNDORA）、Haseko Corp.（日股：1808）

三大市場：日本（25.05%）、英國（14.76%）、加拿大（7.11%）

*數據截至今年十月七日

若有料報畀彩兒同Kitty或有嘢問，可電郵money.biz@on.cc

Kitty、彩兒