絲絲講場：債王追15億花紅爆舊老闆大鑊
「債券大王」格羅斯舊年九月突然向有份創立嘅太平洋投資管理（Pimco）嬲住劈炮，搞到債市以至國際金融界都「嘩」咗出嚟，事隔一年依家有續集。格羅斯星期四啱啱喺美國入稟告前Pimco同幾個高層，話自己畀佢哋策劃陰謀逼走，依家要索償至少（嗱，係至少）2億美元（約15.6億港元）。喂，又係花生時間。
轟Pimco高層只攞着數
呢班人點解要逼走佢？為咗權力、貪婪、同為咗喺錢同名譽上攞着數喎，格羅斯喺份入稟狀第一句係咁講，佢仲話呢班人不惜犧牲埋投資者嘅利益添。
佢仲話，自己○七年將埃利安由哈佛拉返入Pimco，打算Groom埃利安接班，點知埃利安帶埋哈佛學嗰套返嚟，想Pimco唔單止搞做開嘅債券，直頭搞埋股票、商品、房地產同類似對沖基金嘅高風險產品添，格羅斯梗反對。兩家反面就好難免，格羅斯舊年提出自己淡出前線，但結果搞搞吓，埃利安索性自己辭職，話想多啲時間陪屋企人同寫書喎。
Pimco入面有個基金經理，事後為咗幫埃利安出氣，打電話畀多間報館爆咗好多不利格羅斯嘅料。格羅斯想炒嗰位仁兄但炒唔到，自己反而畀人逼走咗，至於嗰位仁兄就做咗Pimco明日之星。
為啖氣 預告盡捐賠償
格羅斯仲話，自己喺Pimco個花紅Pool可分20%，分紅一向係年尾重手啲，得咁啱，佢就喺第三季季尾前五日畀人逼走，咁就冇咗預計可落袋嘅2.5億美元。啲錢去咗邊？畀人分咗啩。
格羅斯講明追到乜返嚟，都會捐晒做慈善。今次打官司擺明唔係為錢，純為啖氣。大家擔定櫈仔。
余絲韻