Market Insight：做好友要量力而為

美國九月份就業數據之差勁，有迹象正改變市場對聯儲局短期內加息的想法，就算主席耶倫依然聲嘶力竭預告年內加息機會仍高，利率期貨卻有另一番演繹。十二月加息的機會，由數據公布前四成三降至執筆時三成七。

之前有大行做過統計，自一九九四年開始，或者免得驚動金融市場，構成不必要震盪，聯儲局未試過有一次貨幣政策變動，喺低於七成市場共識之下進行，依家估年底加息的，得番稍高於三分之一機會率，聯儲局實在無必要夾硬嚟，尤其現時通脹還不到目標的2%，實在大有條件繼續拖得就拖。

美元回軟，油價及商品貨幣回升，整個金融市場似乎正在掉轉頭玩，隔晚國際油價勁彈6%逼近50美元水平，昨日「三桶油」一開波就發力，好友見三隻重磅股撐實個指數，亦都順水推舟，挾到期指淡友及唔夠倉的基金，急急補倉，結果恒指升破八、九月期間連番升至22,000點無功而還的四頂阻力，勁升684點收報22,515點，成交額對晒辦，跌市以來罕有地破千億元。

重返兩萬四唔算難

睇番九月期指結算日，恒指跌到20,386點創大時代新低，期指淡友大獲全勝之後，已經見連續三日裂口向上，看來第三季結之後，手持現金比例處於近幾年高位的基金，都有知恥近乎勇的覺悟，望第四季可以追回一些失地。事實上，家陣A股兩融由高位滑落，股指期貨在阿爺限制多多下，早就半死不活，做淡質現貨誘因都無埋，滬綜指落到三千點，沽壓有限，壞消息出盡。

反之，美國短期加唔到息，IMF九成機會短期將人民幣放入特別提款權（SDR）貨幣，三間電訊商的鐵塔公司上市，汽車、房地產及澳門賭業的針對性振興措施卻陸續出台，短期個市未必太淡，高位蟹貨多籮籮，去返大時代高位28,588點就無乜可能，但以低位20,368點計，彈番跌幅五成見24,478點，即大時代起步位25,200點樓下，機會是未可抹殺。

燃氣股靜待好消息

今日A股復市，連日來美股同港股勁升，內地官媒又落足嘴頭，做埋統計話「十一」假期後，首日及當月滬綜指六成機會向上，驚死你唔信一樣，照計滬綜指見3,150點甚至3,200點唔係唔得，但只怕開得咁高，即市回番多少，港股都會有班趁勢食胡之士，今日衝入去前都係睇定先好。

講番個市，其實嘉能可（00805）早幾日的報復式反彈，短短幾日低由低位反彈六成八，在在反映商品相關投資，在嚴重超賣下，展開了猛烈的修正。固然三桶油都好巴閉，中海油（00883）咁大隻藍籌可以一日抽13.7%，搞到二三線股一樣，三桶油加埋貢獻指數122點。

上周末，油組老大哥沙特先因為國庫空虛，庫存積壓要減價促銷，油價彈返到50美元樓上唔難，但三桶油業績點都要幾年時間先有機會返回一四年水平，死貓彈之後，感覺上值博率又唔係好高。四月以來，燃氣股跌幅唔細，昨日瑞信調高新奧能源（02688）目標價一蚊咁大把，由53元改為54元，但重點是該行認為內地天燃氣消費增長，有機會不及市場預期樂觀。

不過，四月至今新奧股價跌幅亦大致反映，展望阿爺要催谷潔淨能源應用，短期有機會調低非居民用氣價格達兩成，結果一眾燃氣股統統炒晒上去。其實對比石油股，燃氣股即使今年業績升得少及些微倒退，都已經在近半年調整反映咗，像新奧一六年預期市盈率得12.3倍，貼實10至33倍的十年歷史估值下限，假如真有減氣價消息，彈力斷估會比較強。

華晨隨時加速追上

勢估唔到，汽車股炒極都仲未夠喉，長汽（02333）再升14.7%，同幾日前低位6.5元相比，累積升六成三，阿爺減低1600cc樓下車種稅金，長汽又有八、九成車款受惠，基金狂補可以理解，有啲古怪是今浪升得唔多的華晨（01114），昨終於上番雙位數，升9.4%報10.24元。

華晨寶馬主打的3系、5系及X1，由車網見得兩款入門版316有1600cc級別，其他都未能受惠九月底出台措施。

該股八月中期業績急跌逾四成後，高管調低過全年華晨寶馬銷售增長預測到頗悲觀的4%，會唔會因應近排車市好番，掉頭調高抑或有其他消息跟尾，睇見昨日個勢，可以留意吓。

古勝