美國大學研究發現，有錢女人擇偶，偏向揀至少同自己有番咁上下經濟能力嘅男性，嗱，係「至少」；至於有錢男人搵對象，係唔睇錢嘅，佢哋係揀身材窈窕嘅。
絕望？未夠。嗰啲高學歷嘅男人又點揀？揀女人有腦？唔係噃，佢哋比有錢男人更貪心，唔單止揀身材窈窕，仲要埋樣靚。95%高學歷男士認為要做佢伴侶，樣靚係個Must；中學程度或以下嘅男士就寬容啲，「只有」77%一定要揀樣靚。
膚淺？係架，接受現實吧，呢個係美國Chapman University早前訪問咗2萬8千位18歲至75歲嘅異性戀男女，所得出結果。
點解？理論就咁講嘅，話因為窈窕同青春掛鈎，青春對生育繁殖好重要，所以雄性動物本能傳宗接代就會咁揀；至於雌性動物就睇重存活機會同安全感，所以唔同揀法。
絲絲信唔信呢套？就咁嘅，人係會進化嘅，絲絲唔係百幾年前嘅人囉。若然你真係信，咪話唔提聲你：一、窈窕唔等如瘦；二、研究仲話人愈大就愈唔計較外貌金錢；三、想要乜，同實際搵到個點嘅，絕對係兩回事。
余絲韻