絲絲講場：「鐵塔」估值電訊三雄焗OT

啱啱過去嘅「十一」內地長假，咪以為人人有得放，絲絲所知，內地三大電訊商－中移（00941）、中電信（00728）、聯通（00762）嘅內地財務部員工一律開OT無假放。有幾出奇？喂，內地好少可「十一」OT架，即是等於呢度聖誕同農曆新年冇得放咁緊要。為乜咁緊要？就係為咗喺今個月底前搞掂鐵塔公司注資囉！

說好的鐵塔公司，搞咗年幾兩年都未得。成件事原意係想三大電訊商嘅發射塔共享，因資產估值過程複雜，遲遲未成事。明明話八月成立到，又押後到九月，依家都十月喇，再唔成立到，盤數睇怕要重新計過，所以要開Turbo趕住今個月搞掂。若然月底真係搞得掂，電訊三雄嗰幾位新阿頭會唔會趁機嚟香港同大家見吓面呢？

講開啲阿頭，呢期亦為變陣忙爆。話說王曉初（圖）由中電信過檔聯通後，據聞佢翻炒喺中電信嗰套必殺技－就係要聯通加快4G建設。另外，亦有阿頭「走出去」飛身海外傾大Deal喎，邊個？你估吓。

余絲韻