絲絲講場:六福回味着孖煙囪賣金

「十一」內地長假,香港零售吹淡風,是否入緊寒冬,絲絲唔敢講,只知今時唔同往日。六福集團(00590)主席兼CEO黃偉常做咗珠寶行近半個世紀,佢都感慨舊時同依家珠寶行「做法完全唔同」。

黃主席憶述,當年舖頭賣嘅款式唔使多,唔夠就訂造,「點似依家包羅萬有」,總之以前「吊支燈、擺條軌,幾件貨喺度就搞掂」。咪睇依家啲珠寶行銷售員個個西裝骨骨,黃主席笑話,以前做Sales「着條孖煙囪,着件文化恤」就搞掂。

唔知黃主席講緊嘅「文化恤」係乜?即是今時今日嘅Tee,直接啲講以前叫「底衫」。唔識唔出奇,確實有番咁上下閱歷先識叫「文化恤」。

講返珠寶行,今時六福要突圍吸客,亦喺Marketing方面搞搞新意思,除咗Keep住贊助港姐后冠珠寶之外,仲搞多瓣賽馬日,招呼VIP客。

六福執董黃蘭詩(Nancy,亦即是黃主席位千金)話,公司宣傳費會着力控制喺總收入嘅1%,Nancy話贊助賽馬日嘅花費合理。

二代自細要落舖幫手

雖然行業經歷多次轉變,但六福有一樣嘢冇變,就係代代都自細就落舖幫手。黃主席自己童年時代就開始幫忙父母打理金舖,接手咗家族生意唔經唔覺超過廿年。唔只黃主席係咁,佢千金Nancy一樣係七、八歲就落舖頭幫手,仲識得幫手賣嘢添。

Nancy同阿哥黃浩龍,現時分別係六福執董與副主席。黃主席同絲絲講,話會多啲畀仔女接手,仲讚佢哋處理一般業務都得心應手,只係有突發事件先可能要開會商量。

絲絲覺,就算零售寒冬真係嚟緊,只要香港Keep得住嗰種代代自小落手實幹嘅傳承,這個冬天不太冷。

余絲韻