絲絲講場 :日資寸港銀 擺7仔上枱
唔少日本商人旅居香港，有日本銀行仲特登嚟香港設立財富管理中心。日資行Nippon Wealth Limited來港兩年，終於拎齊證券同有限制銀行牌照，財管業務下周一就全面投入服務。尋日場記者會，佢哋位CEO中島努先生只係輕輕舉咗一個例子，就講出咗香港同日本有幾唔同。
鞠躬多謝 Vs 嘟一聲
日本銀行同香港銀行有咩唔同？除咗銀行職員大部分來自日本外，就係傳說中嘅日式待客之道。好似中島先生主持記者會，首先就同傳媒朋友鞠躬打招呼，絲絲都有少少受寵若驚。
不過，中島先生話呢啲正正係日本嘅待客之道，就好似去到日本嘅7仔便利店，店員必定會講你好、多謝同鞠躬；至於香港嘅7仔呢，好多時只得一種聲，就係八達通畀錢嘅「嘟」嗰聲。所以佢本人堅持要銀行維持日式優質服務，以窩心取勝。
絲絲諗番起「嘟」嗰聲，份冷漠感都即刻Feel得到。港、日待客文化有幾唔同，明晒。
何止係待客文化，就連啲客本身，都分別好大。尋日同場仲有康宏（01019）嘅資產管理CEO吳家煒（Eric），聽Eric講，日本客雖然慢熱，但就好清楚自己嘅投資需要，又會做足功課，唔會好似香港客一埋嚟就要求「低風險但高回報」。
你唔覺「低風險但高回報」邏輯上有乜問題？冇咩嘅，正宗香港人一個囉，冇事嘅冇事嘅。
余絲韻