孖妹Ｓ檔案：個市淡成咁 經紀點度日？
恒指第三季累跌5,403點，孖妹真係估唔到股災月都未到，就出現咁動魄驚心嘅單一季度跌幅，睇怕我哋都係要節衣縮食，唔好癡心妄想去南韓睇紅葉、搵Oppa！最近我哋搵咗證券界朋友八吓過去一季嘅行業慘況，大家呻吓苦，歌仔都有得唱啦：「苦沖開了便淡」，或者第四季會有轉機呢？
意識提高 早追孖展
蔡：證券商協會永遠名譽會長兼中潤證券副主席 蔡思聰
Kitty：諗起第三季出現嘅股災，我仲心慌慌，有冇券商「缸湖」告急？
蔡：好慶幸券商近年對孖展風險管理意識提高咗，即使有驚濤駭浪出現，都未見到有券商出現叫救命、唔夠數嘅情況。好多行喺大跌市前已經收緊孖展，唔似得十年、八年前借得咁進取，佢哋一見到風吹草動，都已經追定個客孖展，畀定心理準備佢，提醒佢市況波動要坐穩船，講明一旦冇錢嚟（補倉）就會即時被斬倉。
仲有，第三季證券行佣金收入收縮得好緊要，尤其係細行！市旺嗰陣呢類行可以佔整體成交相當大佔比，但係市一靜就縮得最犀利，依家大市成交由2,000億元縮到得番幾百億元，細行就首當其衝。不過，以前慘嗰陣大市得200億、300億元成交咋，依家有600億、700億元成交都算可以搵番啖食。中潤證券一向都好保守，托賴由開業以嚟都未蝕過，我都希望行家唔使蝕啦！
彩兒：大市危危乎，你驚唔驚一直繼續尋底？
蔡：近期有商品界巨擘嘉能可（00805）事件（隨時資不抵債），歐美經濟又疲弱咗啲，美股又喺高位調整咗2,000點，所以市場仲觀望緊美股係純粹調整，定係步入熊市。
望減租 續提升系統
蔡：我認為恒指仲未見底，有機會穿20,000點關口，不過今次嘅調整應該唔係長期嘅，估計會速戰速決，一旦企穩就可以彈番上去，除非美股大跌，咁樣環球股市都冇運行！感覺市道唔係太差，後市會牛皮，等明年再升過。香港市底健康，H股指數成分股市盈率只係6倍幾，A股（滬綜指）成分股及美股（道指）成分股平均都有15倍，所以相比之下港股安全好多。
Kitty：香港舖租貴到震驚中外，券商賺少咗之餘仲要捱貴租？
蔡：我已見到街舖舖租有回落迹象，相信遲啲都會帶動寫字樓租金下滑，再者，如果美國加息，香港呢邊更加會買賣兩閒啦，租金回落固然幫助到券商營運，但係我目前仲未見到寫字樓租金有回落。中潤個舖依家未完租約，仲未有得同業主傾，如果佢肯減啲租就好啦，哈哈！
彩兒：之前大時代券商高調擴張，依家有冇縮沙？
蔡：我哋為咗節流痛苦咗好耐，交易所呢頭話要有新開支，嗰頭又話要加新系統，自從取消最低佣金制之後都好困難，好在上半年市旺，少咗佣金割喉戰，大家有生意唔使做呢啲嘢爭客。好多行家原先打算因應深港通第三或第四季推出而請人，但依家有消息要明年先推出，所以都暫緩計劃，但系統提升就點都要繼續，皆因市旺唔會有時間去做，寧願同事喺市淡嗰陣有多啲時間熟習系統。另外，年頭大家都搵到錢，未會咁快Cut人，如果悶戰延續就唔排除會出現！希望個市唔好吊鹽水咁，搞到券商難預人手，如果年尾都係咁就可能開始有「第一滴血」出現o架喇。
華資行生意或少3成
黃：華融國際證券聯席董事 黃志陽
彩兒：第三季成交縮水，佣金收入跌咗，你會唔會由食和牛打回原形，食番普通牛肉？
黃：第三季港股成交較第二季跌咗50%以上，向來普遍鬼佬行（外資行）係成交嘅主要來源，估計佢哋生意會跌得甘啲，一般華資行生意額應該少咗三成左右，我個人佣金跌幅都係相若。大時代最忙嗰陣，連留喺Office食飯盒都開心，依家得閒到可以有時間好好地食餐飯，都食得唔安樂。因為搵得少咗，即使係去超市買餸，都要揀番啲普通、平日食開嘅材料，唔似第二季咁鬆手，依家買新iPhone可能都要諗一諗先，哈哈！
Kitty：大市徘徊20,000點大關，唔生唔死，你返工會唔會悶到瞓着？
黃：其實依家個市幾咁波動你都知o架啦，可能不時會集中喺一段短時間有比較多盤落，但係過咗就拍烏蠅，大時代高峰嗰排真係全日都好忙，唔係回答客戶查詢，就係落盤買貨，所以情況真係差天共地。
盤房靜到似圖書館
黃：我啲行家都呻慘，佢哋話，有時平日嘅交易重地──經紀房，甚至盤房都靜到似圖書館，呢個情況尤其係A股唔多郁、歐洲市又未開就會出現，多數十一點後至中午收市，又或者係兩、三點就最嚴重！
彩兒：股友畀股災嚇到要食驚風散，依家回魂未？
黃：佢哋第二季心雄，買股好鬆手又進取，又肯持貨較長時間，當時一有題材，不論係AH收窄概念股、殼股、內地行情股佢哋都會買；股災後實力客戶被蟹貨綁死，要等大市出現轉勢先再算，唔太做炒賣，即使會間中細細注短炒都睇股價睇得好緊，如果入咗貨之後大市出現轉勢，佢哋都會好上心。雖然佢哋依家都會短炒內地題材股份，例如軍工股，當然題材冇之前咁多啦，長線少少嘅人就主力撈跌到殘嘅金融股。
黃：其實香港投資者好安全，即使第三季跌得咁甘，都冇乜人嘈，皆因佢哋嚴控孖展風險，一定唔會出現日日被Call孖展嘅情況。我留意到有實力嘅客戶，佢哋第二季頂多只會用10至15%孖展，趁市旺短炒先有機會用50%或以上孖展，都有少數人會「篤手指」嘅。經股災洗禮後，冇人再「篤手指」，鮮有大額孖展客，實力客就揸住蟹貨唔肯郁，一心等大市轉勢，呢啲咪係大市成交縮水嘅主因囉。
佣金全年料有增長
石：致富證券大圍分行經理 石泳傑
彩兒：班股友第三季似乎都係中場休息，咁你哋咪賺少咗好多？
石：股友第三季落盤當然冇咁密，好彩仲有班忠實擁躉炒得密啲，佢哋第二季嗰陣Keep住日日炒、日日賺，第三季就三、幾日先出入一次，只因要等揸緊隻股有錢賺、甩咗身先有得換貨。
雖然券商過去一季嘅佣金收入，比起第二季最高峰嗰陣少咗兩至三成，不過今年首七至八個月相關收入已經勁過舊年全年，所以全年計落實會有增長。
同客「煲粥」打好關係
石：再者，即使第三季市況出現回調，尚有多隻新股同iBond登場，幫到我哋吸新客，客人沽出iBond獲利之後都有買賣其他股份，算係新動力。
Kitty：少咗人落盤，你咪好清閒？
石：我好唔得閒o架，我哋有激活不動戶嘅新計劃，依家密鑼緊鼓籌備當中，會用着數吸引呢類客出山！大時代嗰陣忙住落盤，有時連飯都唔得閒食，目前就有時間做鞏固客戶關係嘅工作，同佢哋煲吓電話粥，收市後出去搵股友講解吓公司嘅交易系統等，近期期指波幅大，所以比較多客查詢相關落盤問題。
我估計第四季大市維持牛皮，市況唔會太差，股友會跟炒國策股，一旦股市回軟，一班撈底友就會出動撐場，唔使太擔心喎。
若有料報畀彩兒同Kitty或有嘢問，可電郵money.biz@on.cc
Kitty、彩兒