絲絲講場：馬雲高價賣畫靠埋堆？
阿里巴巴股價從高位冧咗超過五成兼迭創新低，主腦馬雲轉行搞藝術？未至於咁，不過佢近來真係晉身「知名藝術家」喎。話說馬雲最近拍住另一位真正藝術名家曾梵志，攜手創作咗幅油畫《桃花源》，仲會喺明日（四日）在港作慈善拍賣，估價係150萬至250萬港元間，拍賣所得將撥捐「桃花源生態保護基金會」。外行搞藝術，畫作估價咁高，當然要佢位「幫手」嘅名聲夠照啦。
墨寶曾被踩「畫非畫」
講起馬雲墨寶，佢喺二○一三年自創《馬體墨寶》作畫，被柴台話為「畫非畫」，卻終以242萬元高價拍出，不過當時無A股股災影響囉。
之不過，馬雲旗艦阿里近期股價表現就認真麻麻，股價再創上市低位，市值唔夠12,000億港紙，被對手馬化騰嘅騰訊（00700）再拋離。
余絲韻