絲絲講場：伯南克首選唔係讀經濟
聯儲局前主席伯南克係研究三十年代大蕭條嘅權威，依個背景主導咗佢救市時嘅種種政策。之但係，呢位大師當年點踏入經濟學嘅殿堂？原來皆因入咗哈佛後炒咗Physics（物理）中期試，鍾意數學但又唔夠人叻，到最後一分鐘先至揀Econ！
伯南克嘅啟蒙老師，就係當時教「經濟學入門」嘅費爾德斯坦（Martin Feldstein）。雖然呢位現年76歲嘅哈佛教授做經濟復甦顧問委員會顧問時，批評過伯南克，但伯南克依然讚佢當年教得好，先令自己迷上經濟學。
宅男Blind Date搵女友
仲有，原來伯南克當年高考（SAT），1,600滿分攞足1,590分，雖則夠晒超班，但佢自細已經係個怕醜仔兼書蟲，大咗都係咁。不過，估唔到，正因為佢「宅」，先畀佢搵到個老婆。
話說佢啲朋友覺得佢實在太「宅」，幫佢搞咗個Blind Date，搵咗個一樣咁書呆子嘅女仔Anna出嚟食晚飯，想撮合佢哋。嗰晚書蟲同書呆兩個食完餐意粉後，一齊打咗場乒乓波，咁就撻着咗！Anna之後做埋佢老婆，兼佢兩個細路嘅阿媽。
新書兼爆救市內幕
絲絲點知咁多？事關伯南克舊年二月卸任以後，埋頭寫嘅回憶錄《The Courage To Act：A Memoir of a Crisis and Its Aftermath》星期一就出，除咗捍衞救市措施外，仲講咗好多上面嗰啲。
呢本硬皮英文書全書總共有624頁，要刨驚攞命？定啲嚟，星期四就有中文版。
余絲韻