訂婚戒指應該買幾錢？日本有個「三個月糧」規矩，美國婚嫁公司調查就話平均數係五萬港元有找，美國運通消費調查就話大概港紙萬七蚊，咁即係點？究竟至少要使幾錢先可以訂個老婆？呢啲，絲絲答咗都千祈咪信，聽理財專家點講。
自從50年代鑽石公司出咗句「鑽石恒久遠」（人家原本英文嗰句真係出咗咁耐），鑽石同婚姻自始打風都打唔甩。到七十年代，佢哋喺日本又宣傳要用三個月糧買訂婚戒指，搞搞吓變咗規矩。
理財專家就話，規矩還規矩，規矩係求婚一般會問聲人哋阿爸，不過就算人哋阿爸Say No，你咪都係諗辦法照娶佢，話晒叫做規規矩矩問過咁啫。
又好似母親節，其實係花店、賀卡禮品各類公司推出嚟叫你消費，係唔係事必要跟先。你打個電話或者陪吓媽媽，佢仲開心，邊有媽媽想啲仔女愁住送乜送物。
訂婚戒指，亦係同一道理，價值係在乎心意，唔係個價錢牌，理財專家真係咁話。
若然因為咁而訂唔到佢做老婆，其實係你好彩，呢句絲絲話嘅。
余絲韻