絲絲講場：滙豐晒功臣經典Banker超強
依家做Banker（銀行家），郁啲畀人批評能力，下下畀人叫落台，搞到有啲索性唔做Banker走去搞IT好過，真係今時唔同往日。話說絲絲睇到滙控（00005）發咗兩段片講「尋根」，當中兩位銀行界前輩嘅奇能異行，簡直係經典中嘅經典。
昃臣爵士咩都拆得掂
第一位前輩係銀行總經理Thomas Jackson，人稱昃臣爵士。其實你識佢，中環條昃臣道個「昃臣」就係佢；分分鐘你仲見過佢，事關皇后像廣場嗰個好多年嘅銅像都係佢。
昃臣當年35歲仔已經負責打點成間銀行，佢揸Fit期間（1876-1902年）滙豐大幅擴張，凡識英文嘅都識佢。即係點？即係誇到喺任何地方想寄信畀佢，唔使寫地址，信封只需寫「T.J. CHINA」呢幾個字，就直接寄得到去滙豐總行。
滙控條片仲搵到昃臣位曾曾孫女，阿曾曾孫女話昃臣退休後，滙豐有咩唔掂都仍然搵佢返去處理，佢次次都拆得掂，所以又有個朵叫「Lucky Jackson」。
Hillier創盲人中文凸字
第二位傳奇Banker係Guy Hillier，佢係滙豐北京分行首位經理（1885-1924年），中文唔單止識講仲識寫，同當年官員關係非常唔錯。Hillier後來不幸失明，但係滙豐唔捨得畀佢走，仲安排埋個助手照顧同協助佢留任，之後佢仲同助手結埋婚添。Hillier仲研創咗套中文盲人凸字，當年喺北京好多人用。
以前Banker真係好德高望重，不過係上世紀嘅事。
余絲韻