北水頭等倉：粵投設區間炒波幅
國家主席訪美期間明言中國經濟長期向好趨勢不會改變，到底能否打動美資的心，扭轉走資的趨勢，不妨拭目以待。每次領導人出訪，都帶着巨額訂單做禮，今次都唔例外，得益美企係波音同微軟。但老實講，呢啲都係外交往來例行動作，唔見得兩國經濟合作提升了層次，當睇Show好了。
講番個股，粵海投資（00270）昨日逆市做好，收報11.1元，升4.91%，成交1.44億元。其實今年以來，粵投的股價都相對穩定，大部分時間在10至11元區域上落，「708」股災日曾低見9.08元，但大半個月又上番11元樓上，識得捕捉上車位的話，一年走幾轉，風險可控而回報不俗。
事實上，近十年八載，粵投年銷額不斷擴大，去年度營業額已達到84億元，相信唔使幾耐可以挑戰百億元大關；而去年度純利亦已達43.9億元。
現時公司主要營業額來自銷售淡水及電力業務，去年度佔總營業額比例逾六成，其餘則來自酒店及租金收入、特許專櫃銷售之佣金、以及銷售電力和貨品等。供水生意一來唔怕收唔到數，二來經營現金流較高，再加上控股股東背景之優勢，是粵投獲芬佬長線捧場的一個主因。
截至六月底止，粵投手持淨現金8.5億元，派息比率維持在三成以上，現價一五年度預測市盈率17倍，息率2.5厘，排除有新併購活動因素，現估值未有貨可先忍忍手，有貨就可以逢高減持獲利，候10元邊再翻兜，10元樓下可以再加注，上番11元樓上又分段沽，有波幅玩吓兼算係穩穩陣陣，即使股災月不幸又遇上大震盪，呢隻股攻守兼備，唔怕坐唔番上去。
司慕渢