Market Insight：汽車股銷售好轉

習大大訪美會見美國企業巨頭，當中社交網絡facebook頭目朱克伯格，全程以老婆家人教的「煲冬瓜」與主席對談外，仲喺facebook到tag埋習主席，即時成為咗網絡熱話，大家都估緊，到底主席使唔使翻牆上fb！

話說今次七天訪美行程，大批內地領先企業領袖隨團，媒體計過數，至少掌控着1萬億美金市值的公司頭目一齊訪美，包括中國網絡巨擘騰訊（00700）的馬化騰及阿里巴巴馬雲亦有同行。唔好以為外訪乜都唔做，馬化騰在十七至二十二日期間，先後四次減持騰訊股份套現32億元，計落九個月裏面累積套現近百億元。

減持動機值得深思

股神巴菲特話過，企業高管減持意義及唔上增持，可能純粹係個人理財需要，但發生在向來滴水不漏的中國企業身上，這樂觀想法睇嚟就唔係好啱用。話晒今浪中港市場股災，騰訊股價已係跌得唔算特別多，只係由170元水平落到130元邊，跌幅23%，相比恒指的26%或滬綜指的39%跌幅要少，更加唔使講，硬淨過死對頭，股價級級落的阿里巴巴同期37%跌幅多多聲。

若以騰訊昨收市價130.7元計，一五年市盈率39.4倍，比整體大市不到11倍的估值翻幾番有餘，高估值反映投資者對未來增長前景極為樂觀的預期，但亦代表未來業績可以出錯的空間好細，萬一中國互聯網政策有變，甚至係放啲空間畀facebook一類社交網絡作有限度經營，都可能對估值高昂的騰訊構成重大打擊。

在中國互聯網產業生物鏈上，企得最頂端的領袖都抱住有胡要食心態，彼等凡夫俗子就算不明就裏，斷估唔好同佢拗頸，之前炒過一輪的「互聯網+」概念股，有得走就走咗先。

環境有利新能源車

新世界（00017）公布去年全年業績，賺191.億元，大升96.5%，末期息0.3元。過去一年，新世界賣樓表現的確唔錯，物業發展收入連合作項目應佔收益為103.8億元，分部業績為32.9億元，按年分別上升8.6%及58.5%。趁個市仲旺，預告今年將會推出2,500伙單位。

以年結時1,789億元股東資金，新世界每股產資淨值20.3元，現價7.82元即係市價賣三八折。恕古勝不才，從來都唔識睇，亦甚少推介，折讓再大自已都係抱住只炒不揸心態，便宜一定有便宜的原因，唔信睇番香港兩次樓市高峰期，九七年新世界股價為46元，○七年27元，再睇幾錢大家心照。

德國福士一架「蠱惑的車」，識得在排廢檢測期間自動作假，搞到呢個有78年歷史的老字號大廠形象一落千丈，行政總裁溫特科恩連日死口話唔關佢事，昨日終於都要認低威，引咎請辭為醜聞止蝕。

全球高唱環保意識，在下近年到歐洲旅行，明顯同美國與亞洲，崇尚純電動車及油電混燃車的想法好唔同，大部分歐洲車廠認為排放及石化能源應用有效性上，柴油車更勝一籌，會唔會仲有其他車企走精面使用蠱惑軟件避開排放測試，天曉得。

不過，幾可肯定係，短期內歐洲多國對柴油車肯定會驗屍咁驗，以防走漏眼，未來柴油汽車的研發費用，亦好可能水漲船高，市場環境對電動車及混燃車推廣相信比較有利，可惜香港食啱概念的，數來數去都得在下麻麻哋，但基金相當捧場的比亞迪（01211）。

吉汽列為心水選擇

中國乘用車市場上，柴油車比例僅0.4%，影響應該唔大。講開車股，超過九成公司發表咗八月的批發數據，大趨勢係去庫存情況繼續有改善，銷售的按年跌幅收窄到0.2至0.3%，比早兩個月繼收窄。

隨着庫存減少到不足兩個月水平，短期內汽車銷售按年變化，好可能回到正數，有利於汽車股氣氛，亦係相關板塊八月底至今，普遍見逆流而上的主要原因。衡量估值及一五、一六年增長，都係吉利汽車（00175）最啱心水。