絲絲講場：中字派證協首揸Fit
中資喺本港證券業勢力如日中天，版圖愈擴愈大。話說香港證券業協會剛轉莊，中信建設金融控股董事總經理繆英源（Benny）坐正做主席，係第一位「中字頭」出任呢家老牌證券組織嘅話事人。
本港雖然有多個證券業團體，但以香港證券業協會歷史最悠久，江湖地位好高，政府同監管機構收風一定有佢哋份。
中信繆英源坐正做主席
最近香港證券業協會選出新主席，Benny由副主席坐正做主席。睇你心水夠唔夠清，有冇發覺今次係第一次有來自中資券商嘅做主席，中資券商地位愈嚟愈高。
絲絲估你應該都知，中資券商本身已經有個中資證券業協會，今次「中字頭」再做埋香港證券業協會主席，中資券商喺香港嘅影響力，都唔使絲絲多講。難怪個個都話，以前就話係外資、華資話事，依家就係中資嘅世界。
協會轉莊 後起之秀冒起
講番Benny，佢以前「舊舖」係招商証券，依家過檔咗中信。佢効力協會經已好多年，由○九年開始足足做咗三屆副主席，到今年擔正，主席任期至二○一七年。
今次轉莊另一個矚目之處，係有後起之秀冒起，大唐金融高級副總裁李惟宏進身成為副主席之一。佢出身金融世家，阿爺係李和聲、阿爸係前金銀業貿易場理事長李德麟，絕對係傑出第三代。
余絲韻