絲絲講場 : 系統分析師未來最好撈
未來邊行人工會升得最勁？絲絲知！美國職場資訊網站Glassdoor出報告，統計舊年到今年各工種嘅人工升幅，有指標性，排頭位係「業務系統分析師」。想知自己入唔入五甲？睇下面個表啦。
人工升幅中位數最高
「業務系統分析師」（Business Systems Analyst）做啲乜？佢哋係屬IT範疇，一般亦要識編程式，但就絕對唔係程式員。佢哋負責喺IT項目入面發掘、分析、傳遞同確認客戶要求，仲會參與系統設計同測試咁，即是客戶同IT團隊之間嘅溝通橋樑，即係兩邊嘅嘢都要識要明。呢個工種好搶手，人工一年升10%。
升幅榜頭二十位，大部分係財經（所以你睇財經版就睇得啱喇）或科技行業，不過亦有例外，好似排第五位係「咖啡師」，估唔到。
升得勁還升得勁，實情人工中位數最高又係邊行？又係業務系統分析師，第二係軟件工程師；人工高二十大中，排尾係收銀員，尾二係廚師。講中你？點都好過絲絲，喺個榜度搵極都……究竟喺邊呢？
余絲韻