「屋漏兼逢連夜雨」咪就係咁解：美國九月唔加息令不明朗因素繼續發酵、歐洲面對難民潮問題，周二晚歐美股市已經齊齊跌，昨日連財新公布的中國九月製造業PMI都跌到落○九年三月以來新低的47，令市場恐慌情緒進一步加劇。
走勢上，滬綜指昨日低開低走，收報3,115點，跌69點不算嚴重，事關近期指數仍維持在3,000至3,250點之間浮沉，最慘係滬深兩市成交加埋得5,790億元人民幣，與高峰時日日過萬億元相差一大截。
近期市況飄上飄落，都係揀一些業務性質較穩陣股份。內地環保概念長炒長有，好似「大氣十條」、「水十條」及「土十條」先後推出，加上「十三五」規劃隨時加重環保力度，早前環保部就預期一六至二○年期間，內地環保投資將達6萬億元人民幣，較「十二五」投資額增逾三成，相信主打環保業務的光大國際（00257）可受惠其中。
睇番光國今年上半年業績幾靚仔，期內收入較去年同期上升28%至37.7億元，盈利亦增加25%至10億元。
另外，光國除食正環保條水喉外，亦有國企改革概念，因為國務院早已批准光大集團總公司的重組方案。
走勢方面，光國股價自八月尾開始反彈，10日線已經上破20日線，下方支持位亦逐漸上移，MACD牛叉持續，走勢利好。昨日股價跌1.2%跑贏大市，收報10.7元，成交4,811萬元，現水平炒短線就話要靠運氣，但長線紿終有實業支持。
司慕渢