絲絲講場：「大限手環」玩死網民
早排市場研究機構IDC公布今年第二季全球健康監測功能穿戴裝置（簡單講，即是健康手環）市場形勢，市佔頭三位係Fitbit、Apple Watch、同埋小米手環，連絲絲都煩惱緊究竟揀邊隻送畀就快生日嗰位朋友好。
話口未完，網上即刻有料到，唔係Fitbit，而係Quitbit「大限手環」！呢件身外物，仲唔係至完美嘅生日禮物！
殯儀公司出品惹熱議
加拿大殯儀公司Mount Pleasant Group官網話出咗隻Quitbit，係倒數手環，話用一條複雜嘅計算法得出用家仲有幾耐就夠鐘講拜拜。「嗶」一聲嗰陣就要醒水去搵佢哋安排後事。以前一個「死」字會嚇走晒啲人，依家「大限手環」條宣傳片一出，網上人人講，幾乎掀起炒風，世界變。
飛撲去預訂？諗住炒翻轉？死心吧。事關一Click入個Pre-order個Key，就發現成件事只係單玩得好大嘅宣傳，佢哋根本無出「大限手環」，純粹係個殯葬服務廣告。世事邊得咁完美？絲絲都開始死心。
余絲韻