絲絲講場：利邦CEO系出名門
利邦（00891）搵埋唔少猛人加盟，咪淨識近排踢高咗佢哋股價嘅球星咸爺，其實利邦舊年五月上任位CEO高顯仁（Richard Cohen）亦好有來頭，阿爸係Burberry英國區業務嘅阿頭，Richard體內自細就係流住藍色血，浸住名牌大。
自細與奢侈品打交道
藍血人，絲絲嘅意思係Blue Blood，咪同絲絲講汽水或絲帶，仲唔明藍血係乜？幫幫忙自己查字典，畀啲自學精神出嚟。
講返Richard，佢自細跟住阿爸有得學，18歲踏出英國，開始周遊列國，住過法國、西班牙、意大利等地，直至21歲暫時喺紐約定落嚟。
Richard今年60歲，但就已經有40年服務同零售業嘅經驗，仲唔係一般嗰啲，即是做過意大利名牌Ermenegildo Zegna北美業務嘅CEO，係咁易做咗16年咁啫。
而佢加入利邦之前，就做緊奢侈品連鎖百貨Saks Fifth Avenue嘅業務發展高級副總裁咁囉。無乜嘢嘅，幾乎成世人都浸住名牌咁啫。
聽講，係馮氏集團副主席兼利邦非執董馮國綸邀請佢加盟，想佢幫手發大盤生意，Richard覺得可以「Give it a try」（試吓咁解），不過Richard慨嘆自己年紀大，今次係「最後一試」咁話。
利邦上星期宣布旗下品牌Kent & Curwen簽咗5年獨家約，可以用咸爺（碧咸）嘜頭，聽Richard講，單Deal原來都傾咗好幾個月，Richard仲大讚咸爺喺行商方面好學不倦添。
話時話，今年上半年，利邦自上市以來首次錄得虧損，今次可唔可以靠咸爺嚟個華麗翻身呢可。等睇等睇。
余絲韻