絲絲講場：英廣告公司帶阿媽返工
領展（00823）早排換新名兼換新Logo，設計新Logo位設計師Tom Munckton，出自英國著名廣告設計公司Mother London。公司其中一樣好出名嘅，就係啲設計師每朝返工都見到阿媽。
帶埋阿媽返工？事關公司有幅牆，掛滿晒員工啲媽媽嘅相，意思係要每位員工記得，自己做緊啲足以讓媽媽驕傲同自豪嘅嘢。
前設計總監創作領展Logo
公司行內好出名，可口可樂、Ikea都係佢客仔。幫領展負責新Logo嗰位Munckton，原本係Mother London設計總監，三個月前先離職。
Mother London仲有樣嘢特別，就係全公司200幾人都係同一張長枱排排坐。張枱好似馬場咁環繞成層辦公室，足足有250呎長，仲好似斜路咁「行上」上一層，分分鐘係全世界最大嘅辦公枱，場面都咪話唔壯觀。佢哋仲有一個規矩，就係呢200幾人每兩個月調一次位，等大家可以識得晒大家兼互相激發靈感。
唉，絲絲做乜當年唔繼續做Designer呢？
余絲韻