絲絲講場：東江爭靚冧巴一額汗
股份代號對新股嚟講，分分鐘緊要過個名，事關好多股民記冧巴唔記名，揀冧巴又要易記，又要好意頭。揀啱心水，若然有人爭，就仲大件事。試過有上市公司老臣子，畀老闆話搶唔到個冧巴就咪返嚟。
話說香港起家、做咗32年模具製造同注塑嘅東江集團（02283），兩年前先喺港交所掛牌，講起當初揀上市冧巴就有段古。
愛2283多重意義
跟咗公司十三年嘅老臣子張芳華（Franky）話，「2283」對東江好有意義：83代表公司八三年成立、22代表雙贏，所以佢哋早就打算用呢個冧巴。
當時係一三年年尾，唔少新股都趕年尾遞文件上市，點知東江揀嘅冧巴，同一間藥業公司撞咗。於是，港交所就用一個好公平嘅方法，就係叫晒佢哋兩間公司一齊嚟抽籤決定。
「抽唔中唔好返嚟」
咁重要嘅嘢，梗係老闆出馬啩？嗰陣連Franky都係咁諗，但勢估唔到老闆竟然係派佢出征，仲話「抽唔中唔好返嚟喇」。老闆呢句，Franky幾咁大壓力，抽籤前一晚直頭瞓唔着。
到抽籤當日，爭冧巴對家位內地女士，視Franky如仇家嘅眼神同氣勢，Franky今時今日仲記得。
結果？Franky依家仲喺公司做緊執董兼首席財務官，結果唔使問啦。至於當日派佢出征嗰位老闆係？呢層，Franky冇直接講喎。絲絲估，會唔會係東江主席李沛良呢可？估計多數係講笑啫！
余絲韻