孖妹Ｓ檔案：財金Hot Terms刨熟咪執輸

國際派：【量化與質化寬鬆（QQE）】

債券操作 掌控資金

彩兒：骨質疏鬆就聽得多，量化與質化寬鬆（Quantitative and Qualitative Easing，簡稱QQE）你又識唔識？

Kitty：日本央行十月加碼寬鬆嘅風出面吹到行一行，外電話，日本首相安倍晉三嘅經濟顧問山本幸三呼籲加碼量化與質化寬鬆，貨幣寬鬆項目至少擴大10萬億日圓（約830億美元），又指十月三十日的政策會議將為一個「良機」。但係，即係乜嚟（口架）？

料難推動經濟通脹

彩兒：唓，冇料扮四條。量寬係央行直接買債，增加金融市場嘅現金數量，去降低現行資金價格；質化寬鬆就係購買長債之餘同時售出短債，旨在壓低未來資金價格，遏抑或者會出現嘅資金緊張。事實上，有分析指，即使日本央行喺過去兩年積極推出經濟振興方案，旨在提振經濟嘅量化與質化寬鬆政策，無助當地企業加速放款或增加貨幣供給量，所以刺激唔到經濟增長同推升通脹。

國際派：【安息年】

猶太用語 七載一劫

M：散戶 Mindy

Kitty：近期「安息年」呢個Term好Hit，傳統啲嘅股友仲話呢個詞唔多利是！

Mindy	Sally	Catherine

M：以我估計，應該係同休息有關，如果係講緊股市嘅話，相信係講緊淡季嘅情況，交投冇咁多，又或者係表示會有衰退出現喇！

日本央行

放大圖片

2001與2008齊冧市

彩兒：事實上，呢個字詞原本係來自猶太教以每七年為一個循環嘅安息年。由於○一年與○八年呢兩次安息年都出現「大冧市」，前者發生911事件，後者驚現雷曼兄弟爆煲，掀起環球金融海嘯，加拿大企業家Jeff Berwick預計，適逢今年係安息年，金融市場勢動盪不安，仲估九月十五日前後將出現一系列影響環球市場嘅重大破壞性事件。呢個預言間接解讀，就係「七年一劫」，好似有啲迷信添，信不信由你。

國際派：【量化緊縮（QT）】

QE邪版孖生兄弟

Kitty：聽聞量化緊縮（Quantitative Tightening，簡稱QT）係量化寬鬆（QE）嘅「邪惡版孖生兄弟」喎，仲有相反嘅性格。

彩兒：你都神神化化嘅！隨住美國、日本、英國及歐洲戀上量寬後，國家貨幣供應基礎齊膨脹，央行推行量寬嗰陣唔係純印銀紙，仲要喺金融市場買番相等額度資產，普遍係國債，但美聯儲局即將加息，中國經濟放緩，致新興市場乍現撤資潮，唔少新興貨幣大幅貶值，直接打擊當地金融體系，啲央行只好減持外儲，好似歐美國債，去捍衞本土貨幣匯率。據彭博截至三月底止數據，喺八個月內環球外儲總額降約4,000億美元，花旗分析員估計，近期每月流失約1,000億美元添。

出現恐累全球經濟

Kitty：有學者話，一旦新興國家拋售嘅歐美國債規模，同歐美國家量寬時購入國債規模差唔多嘅話，有機會令早前實施嘅量寬政策前功盡廢，仲有機會出現量化緊縮，令整體貨幣供應收縮，打擊全球經濟復甦。若真係出現，我驚耶倫BB喊餐死。

內地派：【嬰兒底】

A股狀況如藍籌底

S：散戶 Sally

彩兒：英大證券首席經濟學家李大霄曾創立「鑽石底」及「地球頂」等大熱詞彙，新諗頭就係「嬰兒底」﹗

S：我諗嬰兒底係指暫時預測唔到股市的短期走勢，但不排除市場成熟後會有好大升幅。就好似初生嬰兒咁，BB仔嗰陣唔知佢大個做咩職業，但可能有機會成為好出色的人。

屬李大霄系列詞彙

Kitty：李大霄係話，滬綜指2,850點為「嬰兒底」。佢上星期仲以五個理由支持自己的論點，首要論據係「主要藍籌股估值已經到位，第一輪下行由5,178到3,373點，第二輪由4,006到2,850點，基本到位。主要藍籌股出現低估，上證50的市盈率（PE）為8.5倍，股息率達3.66厘。」所以，佢嘅「嬰兒底」可以話係「藍籌底」。

彩兒：李生早前用「地球頂」形容A股危，喺五月初首次預言滬綜指4,572點是地球頂；六月上旬又話5,147點係地球頂；最後六月中旬第三次指5,178點係地球頂先中。

內地派：【抵押補充貸款（PSL）】、【中期借貸便利（MLF）】、【常備借貸便利操作（SLF）】

人行工具 調控貨幣

Kitty：人行每月初會用微博等途徑定期發布「PSL」、「MLF」及「SLF」等「三兄弟」最近操作情況，見到呢類「火星文」，孖妹即時見暈兼有睡意。

內銀水源三大指標

彩兒：提起抵押補充貸款（PSL），其實人行今年六月起先開始按月公開之前一個月PSL操作情況，個措施係指人行以抵押方式向商業銀行發放貸款，合格抵押品包括高信用評級嘅債券類資產，以及優質信貸資產等，屬於基礎貨幣投放工具之一，同時人行亦以融資利率，引導商業銀行中期利率。想估計內銀「水源」係咪充足，呢個數據就可作其中一個指標。

常備借貸便利操作（SLF）喺一三年創立，對象主要為政策性銀行及全國性商業銀行，期限係一至三個月，人行以此建立短期利率區間；至於中期借貸便利（MLF）就係舊年下旬初次被人行採用，期限係三個月。

內地派：【熔斷機制】

市場太震 停賽新招

C：散戶 Catherine

Kitty：「熔斷機制」，又「熔」又「斷」，係咪即時聯想起鋼鐵或冶煉行業？

C：嘩，呢個術語照字面好難解喎，可唔可以搵吓資料先答你？係咪關於滬深市場入面嘅投資產品嘅交易機制，類似係股票升、跌10%就會停板嘅模式？

股市期指維穩措施

彩兒：好接近喎，熔斷機制係滬深股市及期指市場嘅維穩機制，佢係建基於現有嘅漲跌停板機制下，並以滬深300指數作為指數熔斷嘅基準指數，設漲跌5%、7%指數熔斷關口，每個關口每日只會觸發一次熔斷，觸發5%關口會暫停交易30分鐘，熔斷結束時進行集合競價，之後繼續當日交易，觸發7%關口就會暫停交易至收市。

如果你鍾意同「中字股」玩遊戲，或者透過滬港通炒滬股嘅話，呢個「停賽」機制一出，交易就要更醒目喇。

若有料報畀彩兒同Kitty或有嘢問，可電郵money.biz@on.cc

Kitty、彩兒