北水頭等倉：兩類板塊鑊氣再現

全世界玩完猜謎遊戲，股市又復平淡，上周五A股與港股窄幅上落。展望本周，睇吓「習奧會」兩國共謀發展有咩利好消息，另因月底的一周夾雜中秋假期，跟住係十一假，話唔定月底季結效應會提前在本周出現。

中美兩國元首會面是本周市場焦點，聽聞國家主席會會見美國股神巴菲特、中概科網股代表人物馬雲等。上周五見基建同科網股率先炒起，中交建（01800）及中鐵建（01186）同升逾3%、中國機械（01829）升4%；科網股慧聰網（02280）升近三成、IGG（00799）升約一成半、天鴿互動（01980）、酷派（02369）及神州數字（08255）升逾一成，呢個板塊真係好耐冇見過咁旺場！

事實上，科網股非息口敏感，第三季至今股價普遍低迷，海內外芬佬要在季結炒高一浸動機都唔難理解，本周可以關注。其中，IGG股價近月回落至2.6至2.7元水平現承接，上周五收報3.2元，成交明顯增加。