絲絲講場：庫克捐身家理由如出櫃

庫克話每朝返工，佢枱頭放住馬丁路德金（已故美國民權領袖）張相，馬丁路德金嗰句「人生最為持久、亦最為緊迫的問題是『你為他人做了些甚麼？』」，佢每日都問自己。庫克話自己好清楚世界上有人受緊傷害，好多細路被人蝦被人歧視被人遺棄，所以佢要做啲嘢，簡單就係「想世界更美好」。

出櫃時引用同一金句

絲絲記得，庫克舊年十月出櫃公開自己係同志時，佢一樣係引用馬丁路德金嗰句。

庫克呢位教主，身家估計逾61億港元，佢早就講明除咗留少少畀姪仔做教育費外，其餘會捐晒畀慈善機構。

馬雲：做公益在於參與

又咁啱，阿里教主馬雲前日喺北大一個碩士項目開學禮上演講，呢個係一個社會公益管理嘅碩士項目，所以佢又係講慈善捐身家問題，佢亦講咗N個理由，不過係解釋點解唔應該捐。

馬雲話企業家嘅錢其實唔係企業家嘅，係社會對企業家嘅信任，先會委託佢，幫社會管呢啲錢喎。所以，佢話企業家最大責任係投資，去創造財富同就業，先至係對社會嘅交代喎。馬雲又話若然80歲，都會一毫子唔剩咁捐，但依家都係搞公益好，話公益在於參與，唔一定要畀錢咁話。

好多嘢，單單「應該做」呢一個理由夠晒，明知應做但唔願做先會理由多多。絲絲話嘅。

余絲韻