Market Insight：水泥股有見底迹象

唔少人關注的新一代iPhone 6s以及iPhone 6s Plus，都想趁股市死氣沉沉，入吓飛博一博轉售搵番多少，但聽到CEO庫克話中國同香港一樣，係首批發行市場，博香港賣先到華強北轉售，可以死條心。旺角先達的iPhone交易中心生意，恐怕同股災後港交所（00388）一樣，生意水瓜打狗，因為同胞訂單未必有上一代iPhone咁多（玫瑰金除外）。

後市睇唔通 成交縮

連彈兩日的港股，因為美股腳軟及中國PPI數據差到極，低開後低位表現牛牛皮皮，全日波幅得279點，恒指收報21,562點跌568點，受制於20日線，但又未衰到穿10日線，後市再抽定掉轉頭向下炒，睇嚟仲係五五波。睇唔通揸錢的芬佬原則，大市成交縮到八百億唔夠。

華潤置地（01109）雖然係跌幅最大藍籌，收市跌5%收18.94元，不過昨日話短博高債二線內房，走勢唔失禮，世房（00813）開11.2元，埋單收11.46元微升0.5%，富力（02777）低開見7.3元，埋單跌幅收窄到0.8%報7.43元，昨日裂口開低反而畀咗低買機會。

曾經被傳係股神接班人，並推介過老人家買比亞迪（01211）的李祿，旗下對沖基金喜馬拉雅資本斥1.98億元增持中國中車（01766），股價逆市升5.1%收報9.67元，證明股神個招牌號幾夠號召力，「哎吔門生」入貨都有咁嘅威力！

睇到單新聞相當興奮，在北美起家，做串流影視做到出晒位的Netflix，出年進軍亞洲，包括喺香港會推出服務，收費影視娛樂市場勢必風起雲湧。

Netflix近年服務席捲歐美澳市場，亦係北美最流行網上電影平台，主攻月費提供電影及原創電視劇，早排古勝到美加旅遊，多得朋友借戶口一用，得以在jet lag作祟的晚上，可以用手機、平板以至電視登入大煲特煲，在下可以一次過睇番多年來想睇電影，方便程度及用戶體驗之佳，實在贏香港用開的自選服務幾皮。

電視市場突然吃香

睇佢股價，實在悔恨大鄉里出城出得太遲，Netflix（代號：NFLX）股價三年升10倍，從佢依家過200倍往績PE，加埋股價升幅之狂，有投資經驗的大抵都猜到華爾街大孖沙幾咁睇好呢間公司。

話時話，香港彈丸之地，仲有「文化沙漠」之稱，但近半年幾間財雄勢大的影視娛樂巨企，都對香港市場食指大動。

年初美國Fox話嚟香港拍劇，出到過百萬美金一集的天價，早幾日傳內地樂視以數以十億元破頂價投得英超的香港播影權，加埋Netflix進駐，可以想像一年半載後，香港無論免費同收費的電視市場都肯定有翻天巨變，網絡電視殺到埋身，攞唔到牌做唔到電視大亨變成轉做網購的港視（01137），對住呢班腰纏萬貫的對手，或者真係塞翁失馬焉知非福。

七月底筆者推介過水泥股，一來係第三季水泥價有見底迹象，其次係上半年發改委配合救經濟，狂批新投資項目，大部分係大興土木的基建投資，年底前水泥需求勢必有轉機，好似龍頭海螺水泥（00914），升過又跌過，推介時約24元，抽過上27.95元，八月底中資股山泥傾瀉時最低落到20.3元，近日市況好番又還原基本步，昨收24.8元，總算返回水面。

海螺唔係唔好，只不過反彈市唔知捱到幾耐，如果純綷博水泥市道回穩，短炒一浸，近期睇見隻高槓桿的中建材（03323），都有留意價值。

中建材短炒最啱數

上半年水泥價格與需求雙雙下瀉，一如其他行家，中建材業績倒退五成六，賺得7.916億元人仔。不過，公司高管透露七、八月因應傳統旺季推動，見價量齊升，毛利率亦然。

另外，中建材對比海螺，均屬於高債一族，相比財務規規秩秩的，較能受惠於內地減息的趨勢，短期利好之消息齊備，其股價比七月底接近6元水平，依然低出一截，近日股價在4.06元有見底迹象，連出五日陽燭之餘，兼見成交級級上，走勢相當對辦，短炒可以諗佢博至少返回七月底股價的水平。

古勝