絲絲講場:着西裝入fb 唔當自己友

facebook專管Instagram市場推廣嘅高層,喺間公司做咗成十年,返親工都仲成日畀保安截住,唔認得佢,要佢出示訪客證!被保安當做外人,理由就係,佢着西裝,仲係靚西裝。

老餅高層 保安例查

呢位西裝人就係Matt Jacobson。搞成咁,絕對係fb創辦人朱克伯格嘅錯,朱仔去到邊都着住佢套淨色衫加老牛,呢套已經係佢本人,甚至係fb嘅標誌,若然朱仔着起西裝,分分鐘冇人認得佢。偏偏呢位Jacobson就死都要着西裝,搞到保安都唔信佢係「自己友」,要佢出示訪客證,問句「你乜水?」。

Jacobson早喺○五年就加入fb大家庭,佢又同啲荷里活明星好熟,仲好鍾意Fashion,鍾意到喺雜誌寫專欄,大講西裝有幾好幾重要。

Jacobson都認自己喺公司入面格格不入,理由除咗西裝之外,仲有一樣,就係佢老。幾老?54歲。喺fb大家庭嚟講,好老好老喇。

余絲韻