絲絲講場：順客隆主席含淚想當年
上市儀式，絲絲去唔少，見盡人間有幾咁意氣風發，但尋日內地超市連鎖店營運商順客隆（00974）首日掛牌，絲絲就估唔到會有呢一幕，佢哋主席勞松盛同絲絲講起咁多年點湊大間公司，講到落下男兒淚，就由佢16歲開始講起……
話說勞松盛16歲就入行，喺順客隆嘅前身供銷社打工，點知一轉眼，喺呢行原來已打拼咗40多年。
轉營超市排除萬難
佢諗番起當年，內地由計劃經濟轉去市場經濟，有幾咁艱辛同痛苦。喺以前計劃經濟下，經營模式好簡單，就係國家配幾多就賣幾多；但當市場經濟打破固有規律，員工同管理層都唔適應，若要生存，就要諗辦法。
到九四年，企業終於成功轉型，喺廣東開超市大受歡迎，連續成個月都要用「拉閘」嚟控制人流，間超市會員卡仲有人喺黑市買賣，甚至炒到幾百蚊一張。今時今日終於修成正果，順客隆仲喺香港掛牌上市，難免勞主席會感觸良多。
尋日順客隆就送咗隻小龍舟畀港交所，因為公司發源於「龍舟之鄉」順德，加上勞主席自己亦鍾意睇龍舟，覺得龍舟活動背後精神好有意思，佢自己亦經常贊助組織龍舟活動。
每手帳面賺150元
雖然尋日隻龍舟一度潛水，順客隆股價曾低見2.85元，但後來上番水面，升上3元樓上，全日收報3.03元，較招股價2.88元高5.2%。未計手續費，每手帳面賺150元。
對企業家嚟講，培育一間公司就好似湊大啲寶貝仔女咁，睇住佢哋由爬爬吓、企唔穩、到識行識走，自然百感交集。一滴男兒淚，就係呢40幾年。
余絲韻